लमजुङ – कोरोनाका कारण सुनसान रहेको अन्नपूर्ण पदमार्गमा विदेशी पर्यटकको आगमन बढेको छ।
अन्नपूर्ण संरक्षण क्षेत्र आयोजना (एक्याप) पर्यटक जाँच केन्द्र धारापानीका पर्यटन सहायक क्षेत्रबहादुर गुरुङका अनुसार २०२२ को जनवरीदेखि हालसम्म ५८५ जना विदेशी पर्यटक आएका छन्। जनवरीमा ४१ जना, फ्रेब्रुअरीमा १६९ र मार्च १५ सम्म ३७५ जना विदेशी पर्यटक पदमार्गमा आएकाे उनले बताए। पदमार्गमा अहिले दैनिक ३०/४० जना विदेशी पर्यटक आएको गुरुङको भनाइ छ।
पछिल्लो समय मनाङ सदरमुकाम चामेसम्म मोटर पुगेपछि आन्तरिक पर्यटकको संख्यामा वृद्धि भएको हो। मनाङका पर्यटन व्यवसायी विनोद गुरुङले मनाङमा अहिले बाह्य पर्यटकको आगमन बढेको बताए।
उनले भने, ‘कोरोना र चिसोका कारण थला परेको पर्यटन क्षेत्र पर्यटक आउन थालेसँगै माथि उठ्ने आशा पलाएको छ।’
कोरोना प्रभावका कारण पर्यटक आगमन संख्या घटे पनि अब पर्यटक आउन थालेसँगै पर्यटन व्यवसाय पुरानै लयमा फर्कने गुरुङको अपेक्षा छ।
पदमार्गमा विशेषगरी इजरायल, जर्मनी, फ्रान्स, अष्ट्रेलिया, बेलायत र अमेरिकाका पर्यटकहरू आउने गरेको एक्यापको तथ्याङ्कमा उल्लेख छ।
लमजुङ सदरमुकाम बेसीसहर अन्नपूर्ण पदमार्गको प्रवेशद्वारको रुपमा चिनिन्छ। बेसीसहरबाट खुदी, भुलभुले, ङादी, स्याँगे, जगत हुँदै मनाङ जिल्लाको ताल, बगरछाप, चामे, थोराङ पास हुँदै मुस्ताङ पुगेपछि अन्नपूर्ण पदयात्रा मार्गको यात्रा पूरा हुन्छ।
लमजुङको सदरमुकाम वेसीसहरबाट सुरु हुने अन्नपूर्ण पदमार्गको यात्रा मनाङ हुँदै थोराङ पास गरेर मुक्तिनाथ, जोमसोम, बेनी अथवा घोरेपानीबाट पोखरा पुगेर टुङ्गिन्छ। पदयात्राका सौखिनहरूका लागि जीवनको प्रतिष्ठासमेत बन्ने गरेको ५ हजार ४१६ मिटरको थोराङ भञ्ज्याङलाई पास गर्दा आन्तरिक तथा बाह्य पर्यटकहरू आफूलाई भाग्यमानी ठान्छन्। अन्नपूर्ण पदमार्ग विश्वका १० उत्कृष्ट गन्तव्यमध्ये एक मानिन्छ।
भर्खरै
लोकप्रिय
