बुटवल– गृहमन्त्री बालकृष्ण खाँणले तोकिएको मितिमा चुनाव हुनेमा शंका नगरी चुनावी तयारीमा लाग्न दलहरूलाई आह्वान गरेका छन्।
नेपाली कांग्रेसका केन्द्रीय सदस्यसमेत रहेका खाँणले शनिबार रुपन्देहीको बुटवल तामनगर–फर्साटिकर सडकमा निर्मित दानव नदी पुलको उद्घाटन गर्दै तोकिएकै मिति वैशाख ३० मा चुनाव हुने बताए।
उनले सरकारले तोकिएकै मितिमा चुनाव गर्नेगरी सबै तयारी थालेकाले चुनाव हुन्छ कि हुन्न भन्ने दोधारमा नरहन र चुनावको प्रचारमा जुट्न आह्वान गरे।
उनले अमेरिकी सहयोग परियोजना एमसीसी नेपालको हितमा भएकाले भ्रमका पछाडि नलाग्न आग्रह गरे।
गृहमन्त्री खाँणले बुटवलको मोतिपुर औद्योगिक क्षेत्रमा बसोबास गरिरहेका बासिन्दालाई व्यवस्थित गरेर औद्योगिक क्षेत्र निर्माणको काम अगाडि बढाइने बताए।
कार्यक्रममा लुम्बिनी प्रदेशका पर्यटन ग्रामिण तथा शहरी विकास मन्त्री डिल्लीबहादुर चौधरीले कोरोना महामारीका बीच पनि सरकारले विकासका काम नरोकेको बताउँदै समग्र लुम्बिनी प्रदेशको विकासको नेतृत्व लिन गृहमन्त्री खाँणलाई आग्रह गरे।
बुटवल उपमहानगरपालिकाका प्रमुख शिवराज सुवेदीले समग्र जिल्लाको विकासको लागि सबै राजनीतिक दल मिलेर काम गर्नुपर्ने भनाइ राखका थिए।
भर्खरै
लोकप्रिय
