काठमाडौँ- गौतमबुद्ध अन्तर्राष्ट्रिय विमानस्थलमा बिहीबार नेपाल वायुसेवा निगमको वाइडबडी जहाजबाट ‘अपरेशन फ्लाइट’ हुने भएको छ।
गौतमबुद्ध अन्तर्राष्ट्रिय विमानस्थलका प्रशासन अधिकृत विनोद सिंह रेवतका अनुसार पर्यटनमन्त्री प्रेम आलेसहित करिब २६० जना यात्रु बोकेर वाइडबडी जहाज बिहीबार अपरान्ह ३ बजे काठमाडौंस्थित त्रिभुवन विमानस्थलबाट भैरहवा विमानस्थल उड्ने छ । उक्त विमान ४५ मिनेटमा भैरहवा अवतरण गर्नेछ ।
विमानस्थल सञ्चालनका लागि योग्य भएको सन्देश प्रवाह गर्न यस्तो उडान गर्न लागिएको उनले बताएका छन्। यसलाई परीक्षण उडानका रुपमा समेत लिइएको छ ।
उनले भने, ‘यसअघि एरोथाइको जहाजबाट यान्त्रिक उडान परिक्षण भएको थियो अहिले चाँहि विमानस्थल उडानयोग्य बनेको छ भन्नको लागि वाइडबडी जहाजबाट ‘अपरेशन फ्लाइट’ गर्न लागेका हौं।’
विमानस्थलमा अन्तर्राष्ट्रिय वायुसेवा कम्पनीलाई आह्वान गर्नु अगाडि यस्तो उडान गर्न लागिएको उनले बताएका छन् ।
विमानस्थलमा सबै उपकरण तथा प्रक्रियाहरु सुचारु गरिने उनले बताएका छन्। यात्रुलाई नयाँ टर्मिनलबाट बाहिर निस्कने व्यवस्था मिलाइने छ ।
गौतमबुद्ध अन्तर्राष्ट्रिय विमानस्थलमा जेठ २ गतेबाट व्यवसायिक उडान सुरु हुँदैछ । पहिलो उडान कुवेतको जजिरा एयरवेजले गर्दैछ ।
भर्खरै
लोकप्रिय
