काठमाडौँ- सिन्धुपाल्चोक जिल्लाको उत्तरी भेगस्थित हेलम्बु गाउँपालिका-३ (साबिक पाल्चोक गाविस) मा बुधबार राति नेपाली कांग्रेस र नेकपा एमालेका कार्यकर्ताबिच कुटपिट भएको छ।
एमाले कार्यकर्ताले कांग्रेस पाल्चोकका कार्यकर्ताले एमाले हेलम्बु गाउँपालिका कमिटी सदस्य फिन्जो तामाङ माथि खुकुरी प्रहार गरेको आरोप लगाएका छन्।
काङ्ग्रेसका कार्यकर्ता र स्थानीय टोले गुण्डाहरूले उनीमाथि आक्रमण गरेको एमालेको आरोप छ।
घटनामा काङ्ग्रेस महासमिति सदस्य हेलम्बु ३ का निवर्तमान वडा अध्यक्ष तथा आसन्न निर्वाचनको वडा अध्यक्षका उमेदवार छिरिङ लामाको नेतृत्वमा २१ जनाको गुण्डाहरूको समूहले एमालेका नेता तथा आसन्न निर्वाचनमा वडा सदस्य उमेदवार बुद्धलाल तामाङको घर इसिङमा नै गएर आक्रमण गरेको एमालेले बताएको छ।
पार्टी आन्तरिक छलफल भइरहेको ठाउँमा राति बेलुका ११ बजेतिर एक्कासि प्रवेश गरी धारिलो हतियार समेत प्रयोग भएको उल्लेख गरिएको छ।
घाइते भएका फिन्जो तामाङको अहिले धुलिखेल अस्पतालमा उपचार भइरहेको छ। घटनामा कांग्रेसका कार्यकर्ता समेत घाइते भएका छन्। घटना लगत्तै स्थानीयले प्रहरीलाई खबर गरेको थिए।
घटनामा संलग्न ५ जनालाई प्रहरीले नियन्त्रणमा लिएको छ भने अन्यको खोजी भइरहेको प्रहरीले जनाएको छ।
भर्खरै
लोकप्रिय
