काठमाडौँ – यौन दुर्व्यवहारको आरोप लागेपछि नेपाल स्वास्थ्य अनुसन्धान परिषद्का एक कर्मचारी निलम्बनमा परेका छन्।
परिषद्मा इन्टर्नसिपका लागि आएकी एक युवतीलाई यौन दुर्व्यवहार गरेको आरोप लागेपछि परिषद्ले तालिम अधिकृत विजयकुमार झालाई निलम्बन गरी कारबाही प्रक्रिया अगाडि बढाएको हो।
इन्टर्नसिपमा आएकी युवतीले आफूमाथि दुर्व्यवहार भएको भन्दै नपवेदन दिएकी थिइन्। निवेदनका आधारमा सोधपुछ गर्दा घटना भएको पाइएपछि झालाई कार्यालयमा राखिरहन उचित नहुने निष्कर्षसहित झालाई निलम्बन गरी कारबाही प्रक्रिया अगाडि बढाइएको परिषद्का एक कर्मचारीले जानकारी दिए।
उनका अनुसार यस विषयमा छानबिन गर्नका लागि समिति गठन गरिसकिएको छ। उनले भने, ‘छानबिन समितिलाई बाँकी तथ्यहरु पत्ता लगाएर प्रतिवेदन बुझाउन भनिएको छ।’
यसअघि २०७६ सालमा पनि महिला सहकर्मीमाथि दुर्व्यवहार गरेको फेला परेपछि झा दुई महिना निलम्बनमा परेका थिए।
भर्खरै
लोकप्रिय
