काठमाडौँ- चलचित्र विकास बोर्डको अध्यक्ष पदका लागि १० जनाले आवेदन दिएका छन् ।
अभिनेता भुवन केसीसहित अध्यक्ष पदका लागि १० जनाले आवेदन दिएका हुन्। आवेदन दिने अन्तिम दिन आइतबारसम्म १० जनाको निवेदन प्राप्त भएको सञ्चार तथा सूचना प्रविधि मन्त्रालयअन्तर्गतको संस्थान समन्वय शाखाले बताएको छ।
शाखाका अनुसार आवेदन दिनेहरुमा भुवन केसी, सम्झना उप्रेती रौनियार, अरुणकुमार प्रधान, मनिष पण्डित, सुष्मा कार्की, नरेश पौड्याल, सुशील पोखरेल, सुचित्रा श्रेष्ठ, दीपक श्रेष्ठ र निर्मलराज पौड्याल रहेका छन्।
आवेदन प्राप्त भएपछि गठित समितिले अब तोकिएको मापदण्डअनुसार आवेदन आएको छ कि छैन भनेर रुजु गर्ने जनाइएको छ । मापदण्डअनुसार आवेदन प्राप्त भए प्रक्रियामा अघि बढ्ने शाखाको भनाइ छ ।
आवेदन दिएसँगै अब अन्तवार्ता लगायतका प्रक्रिया अघि बढ्ने छ। नियुक्तिको प्रक्रिया पूरा हुन अझै केही साता लाग्ने बताइएको छ ।
आवेदन दिएसँगै दशै जना आवेदकले राजनीतिक दौडधुपलाई तीव्र बनाएका छन् । दयाराम दाहालको कार्यकाल सकिएपछि रिक्त रहेको चलचित्र विकास बोर्डको अध्यक्ष बन्न आकांक्षीहरुको रस्साकस्सी तीव्र भएको हो ।
भर्खरै
लोकप्रिय
