काठमाडौँ- उच्च अदालतको आदेशलाई देखाउँदै काठमाडौंको त्रिपुरेश्वरस्थित वर्ल्ड ट्रेड सेन्टरको डिजिटल होर्डिङ बोर्ड सञ्चालन भइरहेकै छ।
काठमाडौं महानगरपालिकाले मापदण्ड विपरीत सञ्चालनमा रहेको भन्दै गत बिहीबार (भदौ १६ गते) उक्त डिजिटल होर्डिङ बोर्ड बन्द गराएको थियो ।
एसटीआर एडभर्टिजमेन्ट प्रालिका सन्दीप हिराचनले १७ भदौमा उच्च अदालत पाटनमा महानगरको उक्त कदमविरुद्ध रिट हालेका थिए । आइतबार अदालतले महानगरको नाममा कारण देखाउ आदेश जारी गर्दै २२ भदौमा दुवै पक्षलाई छलफलका लागि आउन भनेको छ । अदालतको सोही कारण देखाउ आदेशलाई आधार मान्दै एसटीआर एडभर्टिजमेन्टले डिजिटल बोर्ड सञ्चालनमा ल्याएको हो ।
यसअघि काठमाडौं महानगरपालिकाका नगर प्रहरी प्रमुख राजुनाथ पाण्डेसहितको टोलिले त्रिपुरेश्वरस्थित वर्ल्ड ट्रेड सेन्टरको डिजिटल बोर्ड हटाएको थियो ।
महानगरले मापदण्डविपरीत लगाइएका बोर्डहरूलाई हटाउने कामलाई तीव्रता दिइरहेको छ । वर्ल्ड ट्रेड सेन्टरले अनुमतिविना डिजिटल होर्डिङ बोर्ड राखेर विज्ञापन गरिरहेको भन्दै महानगरले होडिङ बोर्ड हटाउने अभियानको सुवात नै उक्त डिजिटल होर्डिङ बोर्ड बन्द गराएर गरेको थियो।
डिजिटल बोर्डबाट आउने प्रकाशले ट्राफिक व्यवस्थापनमा समेत असर पुगेको महानगरको बुझाइ छ । यो डिजिटल बोर्डले २०७० सालमा बनेको नीतिका सबैखाले मापदण्ड मिचेको महानगरको भनाइ छ ।
भर्खरै
लोकप्रिय
