काडमाडाैँ – नवाैँ राष्ट्रिय खेलकुद्अन्तर्गत पोखरा रंगशालाको एथलेटिक्स ट्रयाकमा ४०० मिटर दौडमा आर्मीका सोमबहादुर कुमालले ३२ वर्ष पुरानो कीर्तिमान भङ्ग गरेका छन् ।
उनले १९९० मा बेइजिङ्मा आशाराम चौधरीले बनाएको ४८.३२ सेकेन्डको कीर्तिमान भङ्ग गरेका हुन् । कुमालले ४७.९५ सेकेन्डको कीर्तिमान बनाउँदै नयाँ राष्ट्रिय कीर्तिमान कायम गरेका हुन् । यद्यपि, बेइजिङमा आशाराम चौधरीले इलेक्ट्रिक टाइमिङमा दौड पूरा गरेका थिए । पोखरामा जारी प्रतियोगितामा भने हेन्ड टाइमिङ रहेको छ ।
४०० मिटरमानै एपिएफका आशिष चौधरीले ४९.४० सेकेन्डको समय निकाल्दै रजत जित्दा आर्मीकै प्रकाश दनुवारले ४९.९० को समय निकाल्दै काश्य हात पारे ।
महिलातर्फ एपिएफकी रमिता कुमारी थारुले ५८.१० सेकेन्डको समय निकाल्दै राष्ट्रिय कीर्तिमानसहित स्वर्ण जितिन् । यसअघि यो कीर्तिमान तुलसा खत्रीको नाममा रहेको थियो । खत्रीले २०१९ चीनको हुवानमा भएको स्पर्धामा राष्ट्रिय कीर्तिमान कायम गरेकी थिइन् ।
जितपछि सोमबहादुरले आफ्ना लागि पुरानो कीर्तिमान भङ्ग गर्न पाउनु गर्वको क्षण भएको बताए । उनले भने ‘मेरो लागि यो कीर्तिमा भङ्ग गर्न पाउनु ठूलो सफलता हो । मैले दौडका लागि गरेको मेहनत सफलता प्राप्त गरेको हो ।’
त्यस्तै, महिलातर्फ स्वर्ण जितेकी रमिताले आफूलाई एथलेटिक्समा पहिलेहिबाट लगाव रहेको बताइन् । उनले भनिन्,‘मलाई पहिलेबाटै एथलेटिक्समा लगाब थियो । जसले गर्दा निरन्तर दौडिए । जसले गर्दा सफल्ता हात पारे ।’
भर्खरै
लोकप्रिय
