पोखरा – पुस १४ गतेदेखि पोखरामा आहा रारा पोखरा गोल्डकप सुरु हुँदै छ। पोखरा रंगशालामा हुने गोल्डकपको खेल तालिका सार्र्वजनिक गरिएको छ।
सार्वजनिक खेल तालिकाअनुसार आहा रारा पोखरा गोल्डकपको उद्घाटन खेलमा आयोजक सहारा क्लब र धरान फुटबल क्लब भिड्नेछन्। यी दुई क्बल १२ वर्षपछि आहा राराको उद्घाटन खेलमा आमनेसामने हुन लागेका हुन्।
दशौं संस्करणको आहा गोल्डकपमा उद्घाटनमा मैदान उत्रिएको धरानलाई सहाराले १–० गोल अन्तरले पराजित गर्न सफल भएको थियो। नवौं संस्करणको उदघाटन खेलमा पनि यिनै दुई क्बल भिडेका थिए। त्यतिबेला सहाराले २–१ गोल अन्तरले धरानलाई पाखा लगाएको थियो।
आहा रारा पोखरा गोल्डकपको दोस्रो खेलमा पुस १५ गते विभागीय टोली नेपाल पुलिस क्लब र चर्च ब्वाईज युनाइटेड भिड्नेछन्।
पुस १६ गते सहारा क्लब र धरान फुटबल क्लबबीचको विजेताले सशस्त्र प्रहरी बलसँग अन्तिम चारमा प्रवेश गर्न खेल्नेछ। पुस १७ गते नेपाल पुलिस क्लब र चर्च ब्वाईजबीचको विजेताले मछिन्द्र फुटबल क्लबसँग प्रतिस्पर्धा गर्ने खेल तालिकामा उल्लेख छ।
पुस १८ गते क्वार्टरफाइनल त्रिभुवन आर्मी क्लब र संकटा क्लबबीच हुनेछ। अर्को क्वार्टरफाइनल खेल मनाङ मस्र्याङ्दी क्लबले भुटानिज युथ एससी अमेरिकासँग खेल्नेछ।
सेमिफाइनल पुस २० र २१ गते हुनेछ। पुस २३ गते गोल्डकपको फाइनल हुुनेछ। विजेताले १२ लाख रुपैयाँ र उपविजेताले ६ लाख रुपैयाँ प्राप्त गर्नेछन्। यसपटक पुरस्कार राशिमा वृद्धि भएको छ। विजेताले पाउने पुरस्कारमा २ लाख रुपैयाँ र उपविजेताले पाउनेमा १ लाख रुपैयाँ वृद्धि गरिएको हो।
उत्कृष्ट खेलाडीलाई इलेक्ट्रिक स्कुटर प्रदान गरिनेछ। ०५८ सालमा क्याराभान गोल्डकपबाट सुरु भएको गोल्डकप २२औं संस्करणबाट आहा ! रारा पोखरा गोल्डकपबाट सञ्चालन हुन लागेको हो।
भर्खरै
लोकप्रिय
