पोखरा – स्पेनको बि डिभिजन काथेरेन्यो क्लबसँग गण्डकी ११ पराजित भएको छ। बुधबार पोखरा रंगशालामा भएको मैत्रीपूर्ण खेलमा गण्डकी ११ काथेरेन्योसँग ३–० गोल अन्तरले स्तब्ध भएको हो।
पोखरा रंगशालामा भएको खेलमा काथेरेन्योको जितमा स्पेनका पूर्व राष्ट्रिय खेलाडी माइकल कार्रलेरो, कारमेलो र बेरमुले १/१ गरे। खेलको २३ औं मिनेटमा कारमेलोले पहिलो गोल गर्दै खाता खोले। ३५ औं मिनेटमा माइकलले गोल गर्दै अग्रता बढाए। काथेरेन्योसँग निकै कमजोर खेलेको गण्डकीलाई दोस्रो हाफको अन्तिम समयमा बेरमुले गोल गर्दै जित दिलाए।
‘शान्तिका लागि फुटबल’ नाराका साथ लुम्बिनी गार्डेन फाउन्डेसनले आयोजना गरेको मैत्रीपूर्ण खेलामा गण्डकी ११ अनिल गुरुङ कप्तानीमा मैदान उत्रिएको थियो। खेलमा सहभागी हुन स्पेनी क्लबका ५५ जनाको टोली पोखरा आएको छ।
स्पेनिस क्लब बार्सिलोना र रियल मड्रिडका पूर्व खेलाडी रुबेन डे ला रेड र युलियो सालिनास खेलेका थिए। काथेरेन्योको स्पेनका पूर्व राष्ट्रिय खेलाडी मिचेल सहित स्पेनको ‘ए’ डिभिजन क्लबबाट खेलिसकेका खेलाडी समेत थिए।बुधबार पोखरामा खेलेको काथेरेन्यो शुक्रबार काठमाडौं ११ सँग मैत्रीपूर्ण खेल खेल्नेछ।
भर्खरै
लोकप्रिय
