पोखरा – पाँचौँ सृजना कप भलिबलको उपाधि छात्रातर्फ शान्त मावि र छात्रतर्फ ब्रम्हरुपा माविले जितेका छन्।
पोखरा रंगशालामा शुक्रबार भएको फाइनल खेलमा कन्या माविलाई सोझो सेटमा पराजित गर्दै शान्तले उपाधि रक्षा गरेको हो। शान्त गत वर्षको उपाधि विजेता हो।
फाइनलमा कन्यालाई २५–२०, २५–१७ र २५–१६ सेटमा पराजित गर्दै शान्तले उपाधि पोल्टामा पार्यो। उपाधिसहित शान्तले १ लाख रुपैयाँ प्राप्त गरेको छ। कन्याले ६० हजार रुपैयाँमा चित्त बुझायो।
छात्रतर्फ राष्ट्रिय माविलाई ३–२ सेटमा पराजित गर्दै ब्रम्हरुपा माविले उपाधि उचालेको छ। २५–१८, १९–२५, २५–२०, १५–२५ र १५–१३ सेटमा राष्ट्रियलाई ब्रह्मारुपाले हरायो।
पहिलो सहभागितामै उपाधि जितेको ब्रम्हरुपाले १ लाख रुपैयाँ पुरस्कार प्राप्त गरेको छ। राष्ट्रिय माविले ६० हजार रुपैयाँ पाएको छ।
छात्रातर्फ जनप्रिय मावि तेस्रो भयो। तेस्रो स्थानको लागि भएको खेलमा इन्द्रराज्यलक्ष्मीलाई जनप्रियले सोझो सेटमा हरायो।
छात्रतर्फ साविक विजेता शान्त मावि यसपालि तेस्रो स्थानमा सीमित भयो। उसले जनप्रियलाई ३–१ सेटमा पराजित गरेको हो। तेस्रो स्थान प्राप्त गरेका जनप्रिय र शान्तले ३५/३५ हजार रुपैयाँ प्राप्त गरेका छन्।
सृजना विकास केन्द्र र कास्की जिल्ला भलिबल संघको संयुक्त आयोजनामा भएको पाँचौँ सृजना कप कास्की जिल्ला सामुदायिक विद्यालय छात्रछात्रा भलिबलमा छात्रतर्फ ३० र छात्रातर्फ १५ टिम सहभागि थिए।
भर्खरै
लोकप्रिय
