बार्सिलोनाले स्पेनिस ला-लिगाको उपाधि होडमा आफ्नो प्रभावशाली अग्रता कायम राखेको छ। आइतबार भ्यालेन्सियामाथि १-० को कठिन जित निकाल्दै बार्सिलोनाले शीर्ष स्थानमा ९ अंकको अग्रता बनाउन सफल भयो।
दोस्रो हाफमा १० खेलाडीमा समेटिएको बार्सिलोनाका लागि पहिलो हाफको एक मात्र गोल निर्णायक बन्यो।
बार्सिलोनाका लागि राफिन्हाले हेड गर्दै १५ औँ मिनेटमा नै टिमलाई सुरुवाती अग्रता दिलाएका थिए। उनले सर्जियो बुस्केटको क्रसलाई सदुपयोग गर्दै सुरुवातमानै टिमलाई अग्रता दिलाएका हुन्।
पहिलो हाफमा १-० को अग्रता बनाएको बार्सिलोनाले अग्रता दोब्बर बनाउने मौका गुमायो। ५५ औँ मिनेटमा पाएको पेनाल्टीलाई फेरान टोरेसले गुमाएका थिए। लगत्तै अन्सु फातीको प्रहार पोलमा लाग्दा अर्को मौकापनि बार्सिलोनाले चुकायो।
वान भर्सेस वानको अवस्थामा भ्यालेन्सिया गोल नजिक रहँदा फर्वाड हुगो डुरोसलाई डिफेन्डर रोनाल्ड अरुगोले लडाएपछि उनी सिंधै रातो कार्ड खाएर मैदानबाट बाहिरिएका थिए।
जितपछि बार्सिलोनाले २४ खेलबाट ६२ अंक बनाएको छ। दोस्रो स्थानको रियल म्याड्रिडको २४ खेलबाट ५३ अंक रहेको छ।
भर्खरै
लोकप्रिय
