काठमाडाैँ – प्रधानमन्त्री थ्री नेसन्स कप फुटबलमा नेपालले लाओसलाई पराजित गर्दै शुक्रबार उपाधि चुमेको छ। नेपाल २–१ ले लाओसलाई हराउँदै विजेता बन्न सफल भएको हो।
फाइनलमा लाओस विरुद्ध बराबरी गोल गरेका आयुष घलानले प्लेमेकरका रुपमा उत्कृष्ट प्रदर्शन गरेका थिए। प्रतिस्पर्धात्मक बनेको फाइनलमा नेपालले लाओसलाई २–१ ले पराजित गर्दै उपाधि जित्दा घलानले उत्कृष्ट प्रदर्शन गर्दै नेपाललाई १ गोलले पछि परेको अवस्था उल्टाउँदै बराबरी गोल गरेका थिए। उनले अघिल्ला दुई खेलमा पनि उत्कृष्ट प्रदर्शन गरेका थिए।
प्रतियोगितामा नेपाललाई उपाधि दिलाउन निर्णायक गोल गरेका मनिष डाँगी भने फाइनल खेलको म्यान अफ द म्याच घोषित भएका थिए।
प्रतियोगिताको विजेता नेपालले ५ हजार अमेरिकी डलर प्राप्त गर्दा दोस्रो बनेको लाओसले ३ हजार डलर प्राप्त गरेको छ। प्रतियोगिताको उत्कृष्ट खेलाडी बनेका आयुष घलानले ५ सय अमेरिकी डलर हात पारे।
प्रधानमन्त्री पुष्पकमल दाहालले पूरा समय दशरथ रंगशालामा बसेर खेल हेरेका थिए। उनले खेलपछि विजेता टोली तथा खेलाडीहरुलाई पुरस्कार प्रदान गरेका थिए।
देशसञ्चारकी फोटो पत्रकार वर्षा शाहले खिचेका फाइनल खेल तथा पुरस्कार वितरण समारोहका केही तस्बिरहरु:
भर्खरै
लोकप्रिय
