काठमाडौँका ४ सय ६५ वटा विद्यालयले बुझाए १३ हजारभन्दा बढीलाई छात्रवृत्ति दिएको विवरण

काठमाडौँ- काठमाडौँ महानगर क्षेत्रभित्र भएका ५ सय ४ वटा निजी विद्यालयमध्ये ४ सय ६५ वटा विद्यालयले छात्रवृत्ति विवरण बुझाएका छन् ।

काठमाडौँ महानगरपालिकाले केही दिन अघि छात्रवृत्रि नदिने विद्यालयलाई कारवाही गर्ने चेतावनी दिएको थियो। सोहो बमोजिम महानगरभित्रका ४ सय ६५ वटा विद्यालयले १३ हजारभन्दा बढी विद्यार्थीहरूलाई विभिन्न किसिमका छात्रवृत्ति प्रदान गर्दै आएको विवरण महानगरलाई बुझाएको छ।

विद्यालयले बुझाएको विवरणमाथि निरीक्षण गरी सो सूची प्रकाशित गरिने महानगर प्रमुख बालेन शाहले बताएका छन्।

शाहले सामाजिक सञ्जाल फेसबुकमा पोष्ट गर्दै यो कार्य महानगरको इतिहासमा पहिलो पटक भएको बताएका छन्। उनका अनुसार हालसम्म विवरण नपठाएका विद्यालयहरूलाई १ लाख रुपैयाँसम्म जरिवाना तिराएर थप एक पटक विवरण बुझाउने मौका दिइनेछ। त्यसपश्चात् पनि विवरण नबुझाएमा काठमाडौँ महानगरपालिका शिक्षा ऐन, २०७५ को दफा ५७ को उपदफा ४ बमोजिम विद्यालयलाई प्रदान गरिएको अनुमति वा स्वीकृति रद्द गर्ने गरी कारबाही गरिनेछ ।