स्पेनिस ला-लिगा फुटबलमा आइतबार राति भएको खेलमा बार्सिलोनाले भिल्लारियलमाथि ४-३ को रोमाञ्चक जित हासिल गरेको छ। गोल वर्षा भएको खेलमा बार्सिलोनाले बाजी मारेको हो।
सुरुवातमा नै दुई गोलको अग्रता बनाएको बार्सिलोना विरुद्ध भिल्लारियलले पहिलो हाफमा नै बराबरी गोल फर्कायो। दोस्रो हाफमा भिल्लारियलले अग्रता बनाए पनि टोरेस र लेवान्डोस्कीले गोल गर्दै बार्सिलोनाको महत्त्वपूर्ण तीन अंक निश्चित गरे।
खेलमा भिल्लारियलले चौंथो मिनेटमा नै अलेकज्यानडर सरलठले गोल गरे पनि भी.ए.आरले उनको गोललाई अफसाइड घोषित गरेको थियो। तर खेलमा दबाबबीच फर्किने क्रममा बार्सिलोनाले १२औं मिनेट गाभीको गोलामार्फत् अग्रता लियो। १६ वर्षीय लामीन यमालको पासमा १९ वर्षीय गाभीले हेड गोल गरेका थिए।
१५औं मिनेटमा फ्रेन्की डी यङले अग्रता दोब्बर बनाउँदै बार्सिलोनालाई केही बलियो बनाए। तर २५ औं मिनेटमा फोइथले गोल गर्दै खेलमा फर्कियो। ४०औं मिनेटमा सरलठले गोल गर्दा पहिलो हाफ २-२ गोलको बराबरी भएको थियो।
भिल्लारियलले ५०औं मिनेटमा एलेक्स बएनाको गोलमा अग्रता बनायो। तर ६८ औं मिनेटमा बराबरी गोल गर्न बार्सिलोना सफल भयो। पाँच मिनेट अगाडि मैदान प्रवेश गरेका फेरान टोरेसले बार्सिलोनालाई खेलमा फर्काए।
त्यसको तीन मिनेटपछि नै लेवान्डोस्कीले अग्रता दिलाउँदै बार्सिलोनाको जित निश्चित गरे। जितपछि बार्सिलोनाको तीन खेलबाट ७ अंक भएको छ।
त्यस्तै, ला-लिगाका अन्य खेलमा ओसासुनाले भ्यालेन्सियालाई २-१ ले पराजित गर्दा एट्लेटिको बिलबाओले रियल बेटिसलाई ४-२ ले पराजित गर्याे।
लिगमा रियल म्याड्रिड ३ खेलमा तीन जितसहित ९ अंकका साथ शीर्ष स्थानमा रहँदा गिरोना र बार्सिलोनाको समान ७ अंक रहेको छ।
भर्खरै
लोकप्रिय
