काठमाडौं- विमानस्थलबाट अवैध रुपमा बरामद भएको ६० किलो सुन प्रकरणमा नेपाल प्रहरीको केन्द्रीय अनुसन्धान ब्युरो (सीआइबी) ले ६ जना प्रतिवादीलाई मुद्दा नचलाउन राय दिएको छ।
६० किलो सुन प्रकरणको अनुसन्धान प्रतिवेदन तयार गर्दै सीआईबीले ६ जना प्रतिवादीलाई मुद्दा नचलाउन राय दिएको हो। बुधबार सीआइबीले काठमाडौं सरकारी वकिलको कार्यालयमा प्रतिवेदन बुझाएको छ। उक्त प्रतिवेदनमा ६ जनालाई भने मुद्दा नचलाउन सिफारिस भएको सीआइबी स्रोतले जानएको छ।
स्रोतका अनुसार भन्सार एजेन्ट रूक्मिना सुब्बा, ट्याक्सी चालक अशोक लामा, कार्गोका राजन श्रेष्ठ, गोदाम खोजिदिएको आरोप लागेका नरेश भन्ने सुरेन्द्र तामाङ, भन्सार कार्यालयका कर्मचारी श्रीधर टण्डन र कमल परियारमाथि मुद्दा नचलाउन सीआइबीले राय दिएको हो।
उनीहरु मध्ये रूक्मिना सुब्बालाई राजश्व अनुसन्धान विभाग यसअघि नै हाजिर जमानीमा छाडेको थियो। यस प्रकरणमा उनीहरूको प्रत्यक्ष संलग्नता नदेखिएको भन्दै सिआइबीले मुद्दा नचलाउने सिफारिस गरेको हो।
सीआइबीले यस प्रकरणमा हालसम्म ३२ जनालाई पक्राउ गरेको छ। सीआइबीले १८ जना फरार प्रतिवादी कायम गरी अनुसन्धान प्रतिवेदन बुझाएको हो। फरार रहेका उनीहरूविरूद्ध इन्टरपोलको ‘पर्पल नोटिस’ समेत जारी भएको एसपी सञ्जयसिंह थापाले जानकारी दिए। फरार रहेका १८ मध्ये १४ जना विदेशी नागरिक छन्।
भर्खरै
लोकप्रिय
