पोखरा – घामको पहिलो झुल्को अन्नपूर्ण साउथ र हिमचुलीको चुचुरोमा ठोक्किँदा सुनौलो देखिन्छ। घामको किरण बढ्दै गएपछि माछापुच्छ्रेसँगै मर्दी, गंगापूर्ण, गन्धर्वचूलीलगायतका हिमाल छ्यांगै खुलेर मोहनी लगाउँछ।
मनमोहक दृश्य नियाल्दै हिमालको समीपमा रमाउन मर्दी हिमाल पदयात्रा गर्ने स्वदेशी र विदेशी पर्यटकको यतिबेला भीड लागेको छ। समुन्द्री सतहबाट ४ हजार २ सय मिटरको उचाइमा रहेको ‘भ्यू पोइन्ट’मा सूर्योदय नियाल्न घामको झुल्कोभन्दा पहिले पर्यटकको पाइला पुग्छ।
कास्कीको माछापुच्छ्रे गाउँपालिका–९ मा पर्ने मर्दी हिमाल हाइक्याम्पमा बास बसेका पर्यटक सूर्योदय नियाल्न बिहान २ बजेदेखि नै ‘भ्यू पोइन्ट’ तर्फको बाटो तताउँछन्। ३ हजार ५५० मिटर उचाइको मर्दी हाइक्याम्पबाट २ घण्टाको यात्रामा ‘भ्यू पोइन्ट’ पुगिन्छ।
‘भ्यू पोइन्ट’बाट सूर्योदयसँगै खुलेका हिमालको दृख्य निकै मनमोहक देखिन्छ। ‘भ्यु पोइन्ट’ पुगेर हिमालको सान्निध्यमा रमाएर धित नमरेपछि अधिकांश २ घण्टा उकालो चढेर ४ हजार ५०० मिटर उचाइको मर्दी आधार शिविर पुगेर हिमाललाई स्पर्श गरेर फर्कन्छन्।
भर्खरै
लोकप्रिय
