पोखरा- प्रधानमन्त्री पुष्पकमल दाहाल प्रचण्डले केही दिनमा प्रहरी समायोजन ऐन कार्यन्वयनमा आउने उद्घोष गरेका छन् ।
शुक्रबार तनहुँको आँबुखैरेनी अस्पतालको उद्घाटन गर्दै उनले प्रहरी समायोजन ऐन बनिसकेको र कार्यन्वयन आउन मात्रै बाँकी रहेको बताए ।
पछिल्लो केही दिन ऐन कार्यन्वयनका लागि लगातार प्रहरी र गृहमन्त्रालयसँग छलफलमा जुटिरहेको उनले सुनाए । ‘केही दिनभित्र प्रहरी समायोजन ऐन कार्यन्वयनमा आउनेछ । र प्रदेश सरकारसँग लाठ्ठी हुनेछ । किनभने लाठ्ठी नभइ सरकार हुदैन’, प्रधानमन्त्री दाहालले भने, ‘जोसँग सेना छैन, पुलिस छैन । उस्ले ल एण्ड अर्डर कसरी मेन्टेन गर्ने ? लाठ्ठी हुनेछ ।’
गण्डकीका मुख्यमन्त्री सुरेन्द्रराज पाण्डेले सम्बोधनकै क्रममा प्रधानमन्त्री दाहालसमक्ष प्रहरी समायोजन, जग्गा प्राप्ती र संघीय निजामती ऐनबिना प्रदेश सरकारको औचित्य पुष्टि गर्न नसकिने बताउँदै चाँडो बनाउन माग राखेका थिए ।
जवाफमा प्रधामन्त्री दाहाललेसंघीय लोकतान्त्रिक गणतन्त्रलाई संस्थागत गर्ने पक्रिया अझै चलिरहेको बताए । उनले भने, ‘संघीयता जनताको निम्ति हितकारी छ भन्ने कुरा सावित गर्नलाई तीन वटा ऐन अपरिहार्य छन् भन्ने कुरा हामी सबैले बुझेका छौं । मैले अलि अरुले भन्दा बढी बुझेको छु कि भन्ने दाबी छ मेरो । ’ उनले थपे, ‘एउटा प्रहरी समायोजन ऐन । एउटा संघीय निजामती ऐन । अर्को संघीय शिक्षा ऐन । यि ऐनहरु भएमात्रै प्रदेश सरकार जस्तो हुन्छन् नत्र सरकार जस्तो हुदैन । जबसम्म प्रदेश सरकार हो भन्ने अनुभुति जनतलाई दिलाउन सकिदैन तबसम्म प्रदेशको महत्व के हो त्यले कसरी जनतालाई प्रत्यक्ष फाइदा दिएको हुन्छ भन्ने कुरा विश्वास दिलाउन पनि गाह्रो हुन्छ ।’
भर्खरै
लोकप्रिय
