
काठमाडौं- आरती साहलाई न्याय माग्दै साहकाे परिवार र समर्थकहरूले मानव अधिकार आयाेग अगाडि प्रदर्शन गरेका छन्।
२०१ दिनदेखि साहकाे परिवारले न्याय माग्दै आइरहेकाे छ। आजसम्म पीडित परिवारले न्याय पाउन सकेकाे छैन। न्याय नपाएकाे भन्दै मंगलबार बिहान साहकाे परिवार र समर्थकले मानव अधिकार आयाेग अगाडि विराेध प्रदर्शन गरेकाे हाे।
उनीहरूले मानव अधिकार आयोगका मधेस प्रदेश प्रमुख मञ्जु खतिवडाले अनुगमन गलत बनाएर पठाएको भनेर पहिला आयोगलाई जानकारी गराए पनि आयोगले त्यसलाई वेवास्ता गरेको भन्दै न्याय मानव अधिकारको रक्षासहित माग राखी प्रदर्शन गरेका हुन्।
प्रदर्शनका क्रममा प्रहरीले ६ जनालाई पक्राउ गरेको छ।
माइतीघर मण्डलालाई निषेधित क्षेत्र घाेषणा परेपछि साहकाे परिवारले शान्तिवाटिकामा शान्तिपूर्ण धर्ना दिँदै आएकाे थियाे।
जनकपुरकी २२ वर्षीया दुई महिने गर्भवती साहको दाइजोको निहुँमा हत्या भएको भन्दै आरतीको परिवार धर्नामा बस्दै आएको छ।
धनुषाको मिथिला बिहारी नगरपालिका-३ मिथिलेशवर मौवाही घर भई जनकपुरधाम-९ थापा चोकमा रहँदै आएकी साहको दाइजोका कारण उनको हत्या गरिएको माइतीपक्षको आरोप छ।
साहको शव उनी सुत्ने कोठामा पासो लगाई झुण्डिएको अवस्थामा गत जेठ ७ गते भेटिएको थियो।
साहको माइती पक्षले प्रहरीले पैसाको लेनदेन गरी मुद्दा कमजोर पारेको आरोप लगाएको छ।
तस्बिरहरू: