काठमाडौँ – जबरजस्ती करणी अभियोगमा दोषी ठहर गरेको जिल्ला अदालत काठमाडौँको फैसलाविरुद्ध क्रिकेटर सन्दिप लामिछाने उच्च अदालत जाने भएका छन्।
पुस १३ गते जिल्ला न्यायाधीश शिशिराज ढकालको इजलासबाट दोषी ठहर भएका लामिछानेलाई सजाय निर्धारणका लागि बुधबार इजलास बसिरहेको छ। जिल्लाले सजाय निर्धारण गरि नसक्दै लामिछानेले आफूलाई दोषी ठहर गर्ने फैसलाविरुद्ध उच्च अदालत पाटनमा पुनरावेदन दिने तयारी गरेका हुन्।
सन्दिपका वकिल सरोजकृष्ण घिमिरेले कुनैपनि आधार, कारण र प्रमाणहरुले लामिछाने दोषी नदेखिएको जिकिर गर्दै न्यायको लागि उच्च अदालत जान लागिएको बताए। बुधवार काठमाडौं जिल्ला अदालतमा लामिछानेलाई न्युनतम सजाय तोक्नुपर्ने पक्षमा बहस गरेपछि उनले लामिछाने आफैँले पनि आफू निर्दोष रहेको दलिल पेश गरिरहेकाले न्यायको माग गर्दै उच्च अदालत जाने अधिकार आफूहरुलाई सुरक्षित रहेको तर्कसमेत गरे।
अधिवक्ता घिमिरेले सो सम्बन्धि सम्मानित जिल्ला अदालतको फैसलालाई आफूहरुले मान्नुपर्ने बाध्यता भएकाले कम सजायको माग गर्दै सजाय निर्धारण सम्बन्धि बहसमा आफूहरुले भाग लिएको स्पष्ट पारे।
सन्दिप लामिछानेको व्यक्तित्व, उनले खेल जगतमा पारेको एउटा प्रभाव र उनका असल चरित्रलाई हेरेर र उनको सामाजिक दायित्वलाई हेरेर न्युनतम सजाय होस भन्ने आफूहरुको भनाई रहेको उनको भनाइ छ। उनलले भने, ‘ामी सन्दीप लामिछाने शुरुवातीका दिनदेखि निर्दोष हो भन्ने मान्यता राख्दछौं । र ऊ पनि आफू निर्दोष छु भन्ने कुरामा पूर्ण विश्वास छ । तर हामीलाई सम्मानित अदालतको स्वतन्त्र, निष्पक्षमा अटल विश्वास छ । र त्यो हुँदाहुँदै पनि सम्मानित अदालतले गरेको दोषी ठहर गर्ने जुन फैसला गरेको छ । त्यसमा हाम्रो गम्भिर आपत्ति छ।’
बुधबार न्यायाधीश ढकालको इजलासले लामिछानेलाई न्युनतम सात वर्षदेखि अधिकतम १० वर्षसम्म जेल सजाय निर्धारण गर्दैैछ।
भर्खरै
लोकप्रिय
