नेपालगञ्ज – दादुरा–रुबेला खोप अभियानको तयारी तीब्र गरिएको छ। पालिकाहरुसँगै स्वास्थ्य कार्यालयले खोप अभियानलाई प्रभावकारी बनाउन लागि परेको हो। त्यसका लागि सरोकारवाला निकायसँग अन्तरक्रिया गर्ने काम अन्तिम चरणमा पुगेको छ।
स्वास्थ्य कार्यालय, बाँकेले शुक्रबार जिल्ला समन्वय समिति, सञ्चारकर्मी तथा सरोकारवाला निकायसँग अन्तरक्रिया गरेको छ।
स्वास्थ्य कार्यालयका सूचना अधिकारी एवं खोप फोकलपर्सन नरेश श्रेष्ठले खोप अभियानलाई सफल बनाउन सबै तह र तप्काका मानिस लागि परेको बताए। उनका अनुसार, बाँकेमा एक लाख ६५ हजार ५ सय ६६ जनालाई खोप लगाउने लक्ष्य रहेको छ। फाल्गुन १३ गतेदेखि शुरु हुने अभियान १५ दिनसम्म चल्ने छ।
नौ महिनादेखि १५ वर्षसम्मका बालबालिकालाई खोप लगाइदैछ। त्यसका लागि एक हजार दुई सय ९५ जना स्वास्थ्यकर्मी, एक हजार नौ सय ४४ जना स्वयंसेवक परिचालन गरिएको छ। गतवर्ष नेपालगञ्जमा महामारी फैलिदा एक जनाको मृत्यु भएको थियो भने जिल्लामा ३ सय २९ जना संक्रमित भएका थिए। खोप नलगाएका व्यक्तिमा संक्रमण देखिएको अधिकारीहरुले बताएका छन्।
जिल्ला समन्वय समितिका संयोजक ज्ञानेन्द्र चौधरी, उपप्रमुख सीता कार्की, सहायक प्रमुख जिल्ला अधिकारी जोरासिंह माझी, भेरी अस्पताल, नेपालगञ्जका निमित्त मेसु डा। दिनेश चौधरीलगायतको उपस्थिति थियो।
भर्खरै
लोकप्रिय
