काठमाडौँ – नेपाल विद्यार्थी संघले विद्यालयको होस्टेलमा १४ वर्षीया शालिन पोखरेल मृत फेला परेको घटनाको सत्यतथ्य छानविन गरी दोषीलाई कारबाही गर्न माग गर्दै प्रदर्शन गरेको छ।
नेविसंघले शुक्रबार नयाँ बानेश्वरमा विरोध प्रदर्शन गरेको हो। प्रदर्शनका क्रममा प्रहरीले ७ जनालाई पक्राउ गरेको छ।
गोरखा अजिरकोट गाउँपालिका– ५ मुच्चोकका दिपेन्द्र पोखरेलकी १४ वर्षीय छोरी शालिन चितवनको रत्ननगर नगरपालिका–१० स्थित एकता शिशु निकेतन स्कुलद्वारा सञ्चालित होस्टेलमा मृत फेला परेकी थिइन्। कक्षा ८ मा अध्ययनरत उनी फागुन १२ गते झुण्डिएको अवस्थामा मृत फेला परेकी थिइन्।
शालिनका बुवा दिपेन्द्र र आमा सगुनले आफ्नी छोरीको बलात्कारपछि हत्या भएको आरोप लगाएका छन्। बिहीबार काठमाडौँमा पत्रकार सम्मेलन गर्दै दिपेन्द्रले भनेका थिए,’लास झुण्डिएको अवस्था र त्यहाँका वातावरण र वस्तुस्थिति हेर्दा मेरी छोरीले झुण्डिएर आत्महत्या गरेको भन्ने दावी अस्वभाविक र अपत्यारिलो देखिन्थ्यो।’
घटनापछि सो विद्यालयमा गइ मृत्युको सम्बन्धमा छलफल गर्न शिक्षक, अभिभावक, व्यवस्थापन समिति, शालिनकी रुममेट, राजनीतिक दलका प्रतिनिधि, स्थानीय सरकारका प्रतिनिधिसमेतलाई बोलाइ छलफलपछि मात्र मुचुल्का गरौँ भन्दा प्रहरीले स्कुल परिसरभित्रै आफ्ना भाइ हरि पोखरेललाई निर्घात कुटपिट गरेको किशोरीका दिपेन्द्र बताए।
आफू काठमाडौँमा भएको बेला उक्त घट्ना घटेको जानकारी विद्यालयबाट आएको र ‘म नआइकन कुनै पनि प्रक्रिया अगाडि नबढाउनुस्, म दुई घण्टामा आइपुग्छु’ भनेर विद्यालय प्रशासनलाई जानकारी गराउँदा त्यहाँ पुग्दा प्रमाण नष्ट गराउने मनशायले विभिन्न क्रियाकलाप भइसकेको उनको दाबी छ।
आफू त्यहाँ पुग्नुभन्दा पहिले नै ‘घटना भएको छात्रावास’को ढोका फोडिएको र घटना भएको ठाउँमा सरसफाइ गरिएको उनको भनाइ छ। साथै, शालिनले लगाएको कपडा, जुत्ता पानीमा डुबाइएको अवस्थामा आफूले फेला पारेको र उक्त कुराको भिडिओ फुटेज आफूसँग सुरक्षित रहेको उनले बताए। ती सबै काम प्रमाण नष्ट पार्ने उद्देश्यले भएको उनको भनाइ छ।
भर्खरै
लोकप्रिय
