काठमाडौं- नेपालले २ खेलको टी-२० सिरिजको पहिलो खेलमा आयरल्यान्ड्स वल्भेसलाई ६ विकेटले पराजित गरेको छ। आयरल्यान्ड वल्भेसले दिएको १ सय २२ रनको लक्ष्य नेपालले २३ बल बाँकी हुँदै ४ विकेट गुमाएर पुरा गर्यो।
नेपालको जितमा ओपनर कुशल भुर्तेल ३७ रनमा अविजित रहँदा सन्दीप जोराले ३६ रन बनाए। ४ रनको अवस्थामा जिवनदान पाएका जोराले ३५ बलमा ३ चौका र २ छक्का प्रहार गरेका थिए। त्यस्तै आसिफ शेखले १६ रन बनाउँदा दिपेन्द्र सिंह ऐरी १२ बलमा २ चौका र १ छक्काको सहयोगमा २० रनमा अविजित रहे। आयरल्यान्डका लागि ग्यारेथ डेलानीले २ विकेट लिंदा बेन ह्वाइट र थोमस मयसले १-१ विकेट लिए।
त्यसअघि पहिले ब्याटिङ गरेको आयरल्यान्डले निर्धारित २० ओभरमा अलआउट हुँदै १ सय २१ रन बनाएको थियो। टियू मैदान कीर्तिपुरमा टस जितेको आयरल्यान्डका लागि कुनै पनि खेलाडीले गतिलो स्कोर बनाउन सकेनन्। उसका लागि स्टेफन डोहेनीले ४६ रन बनाउनु सर्वाधिक रह्यो। उनी बाहेक थोमस मयस र लियम म्याकार्थीले समान १६-१६ रन बनाए। नेपालका लागि ललित राजवंशी र गुल्सन झा तथा कुशल भुर्तेलले समान २-२ विकेट लिंदा करण केसी र कुशल मल्लले १-१ विकेट हात पारे। नापलका ८ खेलाडीले बलिङ गरेका थिए।
नेपाल भ्रमणमा रहेको आयरल्यान्डले राष्ट्रिय टोलीसँग २ खेलको टी-२० सिरिज खेल्दा नेपाल ‘ए’ टोलीसँग समान ३-३ खेलको टी-२० र एकदिवसीय सिरिज खेल्ने कार्यतालिका रहेको छ। टी-२० विश्वकपको तयारीमा रहेको नेपाल पछिल्लो समय आफ्नो पुरानो लयमा फर्किन प्रयासरत रहेको छ।
भर्खरै
लोकप्रिय
