काठमाडौं- गुजरात भ्रमणमा रहेको नेपाली राष्ट्रिय क्रिकेट टोलीले लिग चरणको अन्तिम खेलमा बरोडासँग टस हारेको छ। बरोडाले टस जितेर पहिले ब्याटिङ गर्ने निर्णय गरेको छ।
नेपालले आज कप्तान रोहित पौडेल सहित सोमपाल कामी, अभिनास बोहरा र आसिफ शेखलाई बेन्चमा राखेको छ। दिपेन्द्रलाई कप्तानको जिम्मेवारी दिंदा अनिल साहा विकेट किपरका रुपमा रहने छन्।
एसएमएस फ्रेन्डसिप टी-२० कप क्रिकेटमा नेपाल सुरुवाती तीन खेल जित्दै फाइनल पुगिसकेको छ। नेपाल सतप्रतिशत जित सहित उपाधि होडमा आफूलाई बलियो बनाउन चाहन्छ।
बरोडा भने आफ्ना सबै सुरुवाती तीन खेलमा पराजित भएकाले फाइनल पुग्न बञ्चित भएको छ। सान्तवना जितका लागि नेपाल विरुद्ध मैदान उत्रिंदै छ। नेपालले फाइनल आइतबार गुजरातसँग खेल्ने छ।
बरोडासँगको अघिल्लो खेलमा नेपालले २७ रनको जित निकालेको थियो। १ सय ५७ रनको लक्ष्य पछ्याएको बरोडा २० ओभरमा १ सय २९ रनमा अलआउट भएको थियो। यसअघि नेपालले आफ्नो पहिलो खेलमा गुजरातलाई ८ विकेटले हराएको थियो भने फाइनल पुग्ने क्रममा गुजरातलाई दोस्रो खेलमा ८ रनले हराएको थियो।
नेपालसँग हारेपनि गुजरात भने बरोडालाई ५ विकेट र ५७ रनले पराजित गर्दै पुन फाइनलमा नेपालसँगको भेट पक्का गर्यो। नेपालले अर्को सातादेखि ओमानमा हुने एसीसी प्रिमियर कप टी-२० क्रिकेटको तयारीका लागि यो प्रतियोगितालाई लिएको छ।
प्रिमियर कपको विजेताले टी-२० विश्वकपपछि हुने एसिया कप खेल्न पाउने छ। नेपाल उक्त प्रतियोगिताकै तयारीका लागि गुजरात पुगेको हो। नेपाल गुजरातबाटै ओमान प्रस्थान गर्ने तयारीमा रहेको छ।
भर्खरै
लोकप्रिय
