सिमकोट – सदरमुकाम समेत रहेको सिमकोट गाउँपालिकाका सात वटा वडा पूर्ण खोप सुनिश्चित घोषित भएका छन्। शनिवार ५ नम्बर वडालाई घोषित गरिएपछि सो संख्या सात पुगेको हो।
गाउँपालिका स्वास्थ्य शाखाका प्रमुख नरबहादुर भण्डारीले आठ मध्य सात वटा वडालाई पूर्ण खोप सुनिश्चित घोषित गरिएको बताए। ती वडामा उमेर समुह अनुसार निर्धारित सबै खोप लगाउने कार्य पुरा भएपछि वडालाई घोषणा गर्ने कार्य भएको उनले बताए। अब वडा नम्बर ६ बाँकी रहेको र त्यसलाई पनि आईतबार घोषणा गरिने उनले बताए। सवै वडालाई घोषणा गर्ने कार्य पूरा भएपछि सम्युक्त अनुगमनको प्रतिबेदनका आधारमा गाउँपालिकालाई पूर्ण खोप सुनिश्चित घोषणा गर्ने कार्यक्रम रहेको उनले बताए।
यसैबिच शनिबार सिमकोट गाउँपालिका– ५ लाई पूर्ण खोप सुनिश्चित वडा घोषित गरिएको छ। वडा भित्रका सत प्रतिशत बालबालिकाले तोकिएका खोपहरु लगाउने कार्य पुरा भएपछि शनिवार एक कार्यक्रमको आयोजना गरी वडालाई पूर्ण खोप सुनिश्चित घोषित गरिएको हो। उक्त वडा हेर्दै आएका स्वास्थ्यकर्मी राजु रावतले वडा भित्र रहेका सबै बालबालिकाहरुले तोकिएका खोप लगाउने कार्य पुरा भएपछि वडा अध्यक्ष चीन रावतको उपस्थितीमा पूर्ण खोप सुनिश्चित वडा घोषित गर्ने कार्य भएको बताए।
पन्द्र महिनादेखि २३ महिनासम्मका ७२ जना बालबालिका वडामा रहेकोमा ती सवै बालबालिकाले तोकिएका बाह्र प्रकारका खोप लगाउने कार्य पुरा भएपछि वडालाई पूर्ण खोप सुनिश्चित वडा घोषित गरिएको हो। ती बालकालिकालाई विसिजी, डिपिटी, हेब्बी, एफआईविवि, पोलियो, दादुरा, जेई, टाईफाईड लगाएत बाह्र प्रकारका खोप लगाएको कारण वडालाई पूर्ण खोप सुनिश्चित घोषणा गरिएको छ। कार्यक्रममा वडा अध्यक्ष रावत सहित वडा सदस्य र स्वास्थ्यकर्मीहरुको उपस्थितीमा यस कार्यलाई निरन्तरता दिने प्रतिबद्धता पत्रमा हस्ताक्षर समेत गरिएको थियो।
भर्खरै
लोकप्रिय
