नेपालगन्ज – बाँकेमा जेठ १३ गतेदेखि पोलियोविरुद्धको आइपीभी खोप अभियान सञ्चालन गरिने भएको छ। स्वास्थ्य कार्यालय, बाँकेले बुधबार जिल्ला खोप समन्वय समितिका पदाधिकारी र सञ्चारकर्मीसँग अभिमुखीकरण एवं वकालत बैठक राखेर आइपीभी खोप अभियानका बारेमा जानकारी गराएको हो।
०७१ असोजदेखि नेपालमा आइपीभी खोप अभियान शुरु गरिएको थियो। वि।सं। २०७३ बैशाखदेखि २०७५ असोज महिनासम्म यो खोप अभाव भयो। खोप अभाव हुँदा छुटेका बालबालिकालाई समेट्न अहिले अभियान सञ्चालन गर्न थालेको सम्बद्धले बताएका छन्। पोलियोविरुद्ध सुईबाट दिइने खोपलाई आइपीभी भनिन्छ।
स्वास्थ्य कार्यालय, बाँकेका प्रमुख अंगदबहादुर शाहीका अनुसार, जिल्लामा ३५ हजार ७ सय ५ बालबालिकालाई खोप दिइदैछ। जेठ १३ गतेदेखि १८ गते अभियान चलाउने र छुटेको पाइएमा २४ गतेसम्म नै खोप लगाउने तयारी गरिएको छ।
स्वास्थ्य कार्यालय, बाँकेका खोप फोकलपर्सन नरेश श्रेष्ठले २ सय ४३ खोप केन्द्रमा एक/एक जना खोप लगाउने व्यक्ति र ४ सय ८६ जना स्वयंसेवक परिचालन गरिदैछ। आइपीभी खोप १४ हप्ता र ९ महिना उमेरका बालबालिकालाई लगाइन्छ। यो उमेरमा छुटेमा ५ वर्षभित्र ४/४ महिनाको फरकमा खोप लगाइन्छ।
जिल्ला खोप समन्वय समितिका संयोजक ज्ञानेन्द्र चौधरीको अध्यक्षतामा भएको बैठकमा नेपालगन्ज उपमहानगरपालिकाका मेयर प्रशान्त विष्ट, प्रमुख जिल्ला अधिकारी खगेन्द्र रिजाल, सुरक्षा निकाय र अस्पतालका प्रमुखहरुको उपस्थिति थियो।
भर्खरै
लोकप्रिय
