काठमाडौं- एसियाकपको तयारीका लागि श्रीलंकामा रहेको नेपाल आफ्नो पहिलो अभ्यास खेलमा श्रीलंकाको स्थानिय टोलीसँग पराजित भएको छ। आफ्नो पहिलो टी-२० अभ्यासमा नेपाललाई श्रीलंका डेभलप्मेन्टले ३३ रनले पराजित गर्यो।
वर्षाले प्रभावित खेलमा ९६ रनको सामान्य लक्ष्य पाएको नेपाल ६३ रनमा समेटियो। वर्षाका कारण १५ ओभरमा घटाइएको खेलमा नेपालका लागि सीता रानामगरले ११ रन र रुविना क्षेत्रीले १७ रन बनाउनु बाहेक अन्य खेलाडीको प्रदर्शन गतिलो रहेन।
देवमी विहांगाले ३ र सेहानीले २ विकेट लिइन्। त्यसअघि टस हारेर पहिला ब्याटिङ गरेको श्रीलंका डेभलप्मेन्टले २० ओभरमा ८ विकेट गुमाउँदै १ सय १८ रन बनाएको थियो। नेपालको इनिङमा वर्षा भएपछि डिएल म्यथोडमा नेपालले १५ ओभरमा ९६ रनको लक्ष्य पाएको थियो।
श्रीलंका डेभलोप्मेन्टका लागि दुलानीले २७ रन बनाउँदा नेपालकी सबनम राईले ३ र राजमति ऐरीले १ विकेट लिइन्। नेपालले श्रीलंका डेभलप्मेन्टसँग तीन टी-२० खेलको सिरिज खेल्ने कार्यतालिका रहेको छ। नेपालले अर्को खेल बुधबार र अन्तिम खेल आगामी मंगलबार खेल्ने कार्यतालिका रहेको छ। नेपालले एसीसी एसियाकपमा आफ्नो समूहमा भारत, पाकिस्तान र युएईसँग प्रतिस्पर्धा गर्दै छ।
भर्खरै
लोकप्रिय
