मनाइयो गाईजात्रा (तस्बिरहरु)

काठमाडौँ – आज देशका विभिन्न स्थानमा विभिन्न कार्यक्रमको आयोजना गरी गाईजात्रा पर्व मनाइएको छ।

एक वर्षभित्र दिवंगत भएका आफन्तको सम्झनामा आजका दिन गाई वा मानिसलाई गाईका रूपमा सिँगारी आ–आफ्ना क्षेत्रमा परिक्रमा गराउने र उनीहरूलाई श्रद्धालुद्वारा दुध, फलफूल, रोटी, चिउरा, दहीका साथै अन्न र द्रव्य दान गर्ने प्रचलन छ।

विशेषगरी गाईजात्रा काठमाडौँ उपत्यकाका काठमाडौँ, ललितपुर र भक्तपुरमा मनाउने गरिन्छ।

राजा प्रताप मल्लले पुत्रशोकले विह्वल भएकी आफ्नी रानीलाई दुनियाँले पनि यस्तै शोक व्यहोर्नुपर्छ भन्ने देखाउन ‘जनतालाई आ–आफ्नो घरका मरेका व्यक्तिका नाममा गाईजात्रा निकाली शहर परिक्रमा गराउनू’ भनी आज्ञा दिएका आधारमा यो पर्व सुरु भएको ऐतिहासिक कथन छ।