मोरङ – विराटनगर महानगरपालिकाका मेयर नागेश कोइरालाले सामुदायिक विद्यालयमा सुधार नआए मर्जरमा लैजाने बताएका छन्।
आइतबार वृहत राष्ट्रिय शिक्षा अभियान नेपालको प्राविधिक सहयोगमा विराटनगर महानगरपालिका वडा नम्बर–४ ले आयोजना गरेको वडा क्षेत्रभित्र सञ्चालित सामुदायिक विद्यालय रुपान्तरण अभियानलाई सम्बोधन गर्दै मेयर कोइरालाले सामुदायिक विद्यालयको गुणस्तर वृद्धिका लागि योजनाबद्ध रुपमा कार्य गरिरहेको र अब पनि सुधार नभए मर्जरमा लानुको विकल्प नभएको प्रस्टाए।
कार्यक्रममा मेयर कोइरालाले महानगरका कतिपय विद्यालयमा विद्यार्थीभन्दा शिक्षक बढी रहेको उल्लेख गरे। उनले सामुदायिक विद्यालयको गुणस्तर वृद्धि गर्ने उद्देश्यले महानगरले सबै सामुदायिक विद्यालयका प्रधानाध्यापकहरुसित कार्य सम्पादन सम्झौता गरेको जानकारी दिए।
गुणस्तर वृद्धिका लागि प्रधानअध्यापक र शिक्षकको मुख्य भूमिका हुने बताएका मेयर कोइरालाले भने, ‘सबै सामुदायिक विद्यालयको गुणस्तर वृद्धि हुनुपर्छ। पछिल्लो समय केही विद्यालयले राम्रो प्रगति गरेका छन्। वडा नम्बर–४ मा पनि गोग्राहा र आधारभूत विद्यालय कञ्चनबारीले राम्रै प्रगति गरिरहेका छन्।’
मेयर कोइरालाले गुणस्तर वृद्धिका लागि विद्यालय–विद्यालयबीच प्रतिस्पर्धा हुनुपर्नेमा जोड दिएका थिए। कार्यक्रममा वडा नम्बर ४ का अध्यक्ष जितन थापाले वडाभित्रका सबै सामुदायिक विद्यालयको गुणस्तर वृद्धि गर्ने उद्देश्यले रुपान्तरण अभियान सुरु गरेको प्रस्टाए। कार्यक्रममा शैक्षिक अभियन्ता अभिषेक घिमिरेले सबैले आ–आफ्नो दायित्व पूरा गरेमा शिक्षामा सुधार आउने बताए।
भर्खरै
लोकप्रिय
