विराटनगर – कोशी प्रदेशका मुख्यमन्त्री हिक्मतकुमार कार्कीले आज विश्वासको मत लिदैंछन् । नेकपा माओवादी केन्द्र कोशी प्रदेश गत साउन ११ गते सरकारबाट बाहिरिएपछि मुख्यमन्त्री कार्कीले विश्वासको मत लिन लागेका हुन् ।
माओवादीले सत्ताबाट बाहिरिएसंगै भदौ १४ गते सरकारलाई दिएको समर्थन समेत फिर्ता लिएको थियो । त्यसपछि सत्ता गठबन्धनमा नेपाली काँग्रेस भदौ २८ गते जोडिएपछि सरकारलाई प्रस्ट बहुमतसहित अघि बढ्न मुख्यमन्त्री कार्कीले विश्वासको मत लिने मुख्यमन्त्री कार्कीका प्रेस सल्लाहकार विक्रम लुइँटेलले जानकारी दिए ।
मुख्यमन्त्री कार्कीले गएको ६ महिनामा दोस्रो पटक विश्वासको मत लिन लागेका हुन् । गत बैशाख २७ गते माओवादीको साथमा मुख्यमन्त्रीमा नियुक्त भएका कार्कीले प्रदेश सभाबाट बैशाख ३१ पहिलो पटक विश्वासको मत लिएका थिए । तर, पछिल्लो राजनीतिक समीकरण फेरबदलसंगै माओवादी सरकारबाट बाहिरिएपछि पुनः विश्वासको मत लिन लागेका हुन् । सरकारमा सहभागि दलले विश्वासको मत फिर्ता लिएमा ३० दिन भित्र मुख्यमन्त्रीले विश्वासको मत लिनुपर्ने संवैधानिक व्यवस्था छ ।
विश्वासको मत लिन लागेका कार्कीले पक्षमा गठबन्धनतर्फबाट एमालेको ४० र काँग्रेसको २९ सदस्यगरि कुल ६९ सांसद रहेका छन्। ९३ सदस्यीय प्रदेश सभामा विश्वासको मतकालागि ४७ सांसद सदस्यको मत आवश्यक हुन्छ । त्यसैगरि, हाल सरकारको विपक्षमा माओवादी केन्द्रका १३, राप्रपाका ६, नेकपा एकीकृत समाजवादीका ४ र जसपाका १ जना सांसद छन् ।
भर्खरै
लोकप्रिय
