पोखरा- पञ्चेबाजा घन्काउँदै विद्यार्थीको लावालस्कर अघिअघि । पछिपछि शिक्षक, विद्यालय व्यवस्थापन समितिका पदाधिकारी । बीचका एक जना शिक्षकको मुहारको रङ छेकिने गरेर अबिरले पोतिएको छ । गलाभरी फूलमाला, खादा र दोसोल्लाको भारी । हर्षबढ्याँई गरेको जस्तै लाग्ने उनका पछाडि पनि विद्यार्थी र शिक्षकको लस्कर देखिन्छ ।
यो दृश्य हो ‘बालकृष्ण सर’ को विदाइको । तनहुँको शुक्लागण्डकी नगरपालिका–९ घारीमा रहेको तालबेंसी माध्यमिक विद्यालयका शिक्षक बालकृष्ण पौडेल सोमबार अनिवार्य अवकाशपछि कक्षाकोठाबाट विदा भए । विद्यालयले उनलाई तामझामका साथ विदाइ गर्यो । विद्यार्थी आफैंले बालकृष्ण सरलाई पञ्चेबाजा घन्काउँदै घरसम्म पुर्याए ।
कास्कीको पोखरा महानगरपालिका–३३ चवादीका बालकृष्ण सरको विदाइ देखेर स्थानीय दंग परे । किनकी यसरी अवकाश प्राप्त शिक्षकलाई विद्यार्थीले बेहुली अन्माएर पठाए जसरी बाजागाजासहित विद्यालयबाट घर पुर्याइएको दृश्य पहिलो पटक देखेका थिए । यस्तो दृश्य विरलै पनि देखिन्छ । बालकृष्णको विदाइको दृश्य यतिबेला सामाजिक सञ्जालमा ‘भाइरल’ छ । धैरले प्रतिक्रिया जनाएका छन्, ‘एउटा शिक्षकले पाउने सम्मान भनेको नै यहि त हो ।’
बालकृष्णले आफूलाई यसरी विदा गरिएला सोचेकै थिएनन् । उनलाई लागेको थियो, सामान्य कार्यक्रम गरेर विद्यालयले विदा गरिनेछ । उनी भन्छन्, ‘यो मेरा निम्ति अविस्मरणीय क्षण रह्यो । मेरो बिहेमा पनि यस्तो गर्न मैले सकेको थिइन । अहिले यस्तो सम्मानसाथ विदाइ हुन पाएँ धेरै गर्व लागेको छ ।’
विदाइमा गरिएको सम्मानलाई आफ्नो जीवनको सबैभन्दा ठूलो कमाइको रुपमा बालकृष्णले अर्थ्याएका छन् । उनले आफूले जीवनभर कमाएको सम्पत्तिको रुपमा विदाइको पललाई संगालेका छन् ।
‘हुन त छाड्ने बेलामा जहाँ पनि गाह्रो हुन्थ्यो । पहिला अस्थायी शिक्षक भएर पनि धेरै पढाएं । सरुवा हुने बेलामा अभिभावक, विद्यार्थी, स्थानीय सबैले नछोड्नु भन्नुहुन्थो’, बालकृष्ण थप्छन्, ‘तालबेंसीले यति धेरै माया मान्ला जस्तो लाग्याथेन । यो त मैले सोंचैकै थिइन । नसोंचेकै भयो ।’
विद्यालय र विद्यार्थीको सम्मानले उनको मन भारी थियो । लामो समय बिताएको पेशाबाट निवृत्ति हुनेबेला पाएको सम्मानले आँखामा टिलपिल भएका हर्षका आँसुलाई माहोल बिग्रेला भनेर उनले डिलमै अड्याए । बाजागाजासहित श्रीमानलाई घर ल्याएको देखेपछि बालकृष्णकी श्रीमति पनि बाटोसम्म आइन् । सरलाई छोड्न आएका विद्यार्थीले उनलाई पनि फूलका गुच्छा दिँदै सम्मान टक्रयाउँदै शीर निहुराए । श्रीमान्लाई दिएको माया र सम्मान देखेर उनले खुशी थाम्न सकिनन् । आँखा डिल हुँदै खुशीका थोपाहरु बरररर खसे ।
बालकृष्णले २०६० सालको कात्तिक ३० गतदेखि स्थायीय रुपमा शिक्षण पेशा सुरुआत गरेका थिए । सुरुमा उनले सरस्वती मावि आहाले गोरखाको कक्षाकोठा छिरेर विद्यार्थीलाई भविष्य कोर्न थाले । १४ वर्ष ९ महिना अघि उनी घरपायकको तालबेंसी मावीका कक्षाकोठालाई कर्मथलो बनाए । निमावि विज्ञान विषयको शिक्षक उनलाई अवकाशको दिन विद्यालयले यादगार विदाइ गरेको हो ।
विद्यालयले बालकृष्ण सरलाई विदाइको दिन पञ्चेबाजासहित घरमै पुर्याएर सरप्राइज दिएको विद्यालयका प्रधानाध्यापक धुर्व वाग्ले बताउँछन् । विद्यार्थी, शिक्षक र विद्यालय व्यवस्थापन समिति मिलेर ‘सरप्राइज’ योजना बनाएको उनको भनाइ छ ।
‘सरले विद्यालयमा लामो समय सेवा गर्नुभयो । विदाइमा हामीले सरप्रति देखाएको सम्मान हो । उहाँप्रति गहिरो सम्मान व्यक्त गरेको हौं’, वाग्लेले भने । तालबेंसीमै लामो समय सेवा गरेर अनिवार्य अवकाश हुने शिक्षकलाई अबदेखि यसैगरि सम्मानजनक विदाइ गर्ने उनले बताए ।
बालकृष्ण सरको विदाइमा बाजा बजाउने पनि तालबेंसीकै विद्यार्थी नै हुन् । विद्यालयले ९ जना इच्छुक विद्यार्थीलाई बाजा बजाउने कला सिकाउन थालेको छ । तर, सिकाउने प्रशीक्षकको अभावमा विद्यार्थी आफैंले ताल मिलाइरहेको प्रध्यानध्यापक वाग्ले बताउँछन् ।
वाग्लेका अनुसार वडाले बजेटकै व्यवस्थापन गर्ने आश्वासन दिए पनि नियमित प्रशिक्षकको अभाव भोग्नुपरेको छ । किताबी ज्ञानलाई सिकाउँदै व्यवहारमा उतार्न प्रयास गरेको उनको भनाइ छ । ‘बाजा हाम्रो लोक संस्कृति भएकाले जगर्नेना गर्न खोजेका छौं । पाठ्यक्रममा पनि बाजागाजाका विषयमा भएकाले विद्यार्थीलाई सिकाउनुपर्नेछ भनेर लाग्यौं’, उनले देशसञ्चारसँग भने ।
भर्खरै
लोकप्रिय
