काठमाडौँ – भारतको उडिसामा विश्वविद्यालयको होस्टेलमा मृत फेला परेकी नेपाली विद्यार्थी प्रकृति लम्सालको न्यायको माग गर्दै काठमाडौँस्थित भारतीय राजदूतावासअगाडि प्रदर्शन गरिएको छ।
नेकपा एमालेको विद्यार्थी संगठन (अनेरास्ववियु)ले सोमबार साँझ भारतीय दूतावासअगाडि विरोध प्रदर्शन गरेको हो। प्रदर्शनका क्रममा प्रहरी र प्रदर्शनकारीबीच धकेलाधकेलसमेत भएको थियो।
प्रदर्शनमा सहभागीहरूले ‘प्रकृति लम्सालको मृत्युको छानबिन गर, मानवता विरोधी गतिविधि बन्द गर, गोर्खेले अन्याय सहन जान्दैन, नो मोर साइलेन्स, अविलम्ब कूटनीतिक संवाद सुरु गर’लगायतका नारा लगाएका थिए।
उडिसास्थित कालिङ्गा इन्स्टिच्युट अफ इन्डस्ट्रियल टेक्नोलोजी (केआइआइटी)मा अध्ययनरत नेपाली विद्यार्थी प्रकृति लम्साल विश्वविद्यालयकै होस्टेलमा मृत भेटिएकी थिइन्।
उनको मृत्यु शंकास्पद रहेको भन्दै त्यहाँ अध्ययनरत नेपाली विद्यार्थीहरूले आवाज उठाएपछि उनीहरूलाई विश्वविद्यालयबाट निस्कासन गरिएको छ।
यता नेपालमा राष्ट्रिय स्वतन्त्र पार्टीकी सांसद् सुमना श्रेष्ठले उक्त विषयमा संसद्मा बोल्न खोज्दा सभामुख देवराज घिमिरेले समय दिएका थिएनन्। पटक–पटक बोल्न खोज्दा पनि समय नपाएपछि उनी संसद् बैठक बहिष्कार गरेर बाहिरिएकी थिइन्।
प्रधानमन्त्री केपी शर्मा ओलीले उक्त घटनाबारे बुझ्न कूटनीतिक पहल भइरहेको बताएका छन्।
भर्खरै
लोकप्रिय
