मोरङ- विराटनगरस्थित कोशी अस्पतालले पोष्ट ओपरेटिभ वार्ड सञ्चालनमा ल्याएको छ । मंगलबारबाट वार्डमा विरामी उपचारको सेवा सुरु गरिएको बताउँदै अस्पतालकी मेट्रोन मञ्जु यादवले वार्ड सञ्चालनमा आएपछि शल्यक्रिया गरेका विरामीको हेरचाहमा सहजता हुने जानकारी दिइन् ।
अस्पतालमा यसअघि शल्यक्रिया गरिएका विरामीलाई समेत वार्डमा राखिँदै आएको बताउँदै मेट्रोन यादवले भनिन्, ‘हिजोको दिनमा विरामीको शल्यक्रियापछि अवस्था हेरिकन सघन उपचार कक्ष तथा वार्डमै राखिने गरिएको थियो । जसका कारण विरामी र उनका आफन्तलाई समेत समस्या भएको महसुस गर्दै आएका थियौं । तर पनि सीमित स्रोत र साधनका कारण अस्पताल बाध्य रहेको थियो । अहिले केहीहदसम्म एचओडी, नर्सिंग इन्चार्ज र स्टाफ नर्सले साथ दिएपछि वार्डलाई सञ्चालनमा ल्याएका हौं । यस विरामीको उपचारमा थप सहता हुनेछ।’
वार्डका लागि २० जना स्टाफ नर्सिंग जनशक्ति पर्याप्त रहेको बताउँदै मेट्रोन यादवले जनशक्तिकै आधारमा वार्ड सञ्चालनमा सहजता भएको बताइन् ।
सुरुवातमा अस्पतालले पाँच वटा शैयाबाट वार्डको सुरुवात गरेको अस्पताल विकास समितिका सदस्य हरि भट्टराईले जानकारी दिए । अस्पतालको विकासमा र विरामीको उपचारमा यसले महत्त्व राख्ने बताएका सदस्य भट्टराईले सञ्चालनमा आएको वार्डमा भेन्टिलेटरदेखि सबै उपचार उपकरण राखिएको बताए ।
हाल सञ्चालनमा आएको वार्डका सबै शैया विरामीले भएका उनले बताए। सदस्य भट्टराईले कोशी अस्पतालमा देखिएका बेथिती र समस्याको हलका लागि विकास समिति, मेडिकल सुप्रिटेन्डेन्टसहित अस्पताल प्रशासन काम गर्दै आएको बताए ।
अस्पतालमा विराटनगर आसपाससँगै सीमापारी भारतबाट समेत उपचारका लागि विरामी आउने गरेको अस्पताल प्रशासनले जनाएको छ ।
भर्खरै
लोकप्रिय
