धनगढी- नेपाली कांग्रेसका सभापति शेरबहादुर देउवासहित अधिकांश पार्टीका पदाधिकारी सुदूरपश्चिम पुगेका छन् ।
आज धनगढीमा भइरहेकाे पार्टीकाे प्रदेश सम्मेलन, मंगलबार र बुधबार धनगढीमा हुने प्रशिक्षणका लागि पार्टीका वर्तमान र पूर्वपदाधिकारीसहित केन्द्रीय नेताहरू धनगढी पुगेका हुन् ।
पार्टी उपसभापति पूर्णबहादुर खड्का, सह-महामन्त्री महालक्ष्मी उपाध्याय, केन्द्रीय सदस्य बालकृष्ण खाँणसहित केहीँ केन्द्रीय नेताहरू आइतबार नै धनगढी पुगेपनि पार्टी सभापति शेरबहादुर देउवासहित अन्य नेताहरू भने साेमबार बिहान मात्रै धनगढी पुगेका छन् ।
साेमबार बुद्ध एयरकाे फ्लाइटमार्फत सभापति देउवा, महामन्त्री गगन थापा, विश्वप्रकाश शर्मा, सह-महामन्त्री जीवन परियार, भिष्मराज आङदाम्वे, पूर्व उपसभापति गाेपालमान श्रेष्ठ, पूर्व महामन्त्री शशांक काेइराला, कृष्ण सिटाैला, केन्द्रीय सदस्य एनपी साउँद, दिलेन्द्र बडुलगायत एक दर्जन केन्द्रीय सदस्य धनगढी आएका हुन् ।
अझै केही केन्द्रीय नेताहरू आउने क्रम जारी रहेकाे कांग्रेस सुदूरपश्चिम सभापति वीरबहादुर बलायरले जानकारी दिए । अधिकांश शीर्ष नेता सुदूरपश्चिम आएपछि स्वागतका लागि धनगढी विमानस्थलमा ठुलाे भिड लागेकाे थियाे ।
आज धनगढीमा भइरहेकाे सम्मेलनमा सुदूरपश्चिमका नाै वटै जिल्लाका अगुवा नेता कार्यक्रताकाे सहभागिता रहेकाे छ ।
भर्खरै
लोकप्रिय
