काठमाडौँ – ६ वर्षकी छोरीलाई बोकेर आन्दोलनमा आएकी छन् ४० वर्षीया चन्द्रीमाया तामाङ। ओखलढुङ्गा स्थायी घर भएकी उनी विगत १६ वर्षदेखि काठमाडौँको कपनमा बस्दै आएकी छन्।
उनका श्रीमान् ज्यामी काम गर्छन्। ज्यामी काम गरेर कमाएको रकम कपनको हाइक चोकमा रहेको सुमो सहकारीमा जम्मा गरेका थिए। तर अहिले उक्त सहकारी त्यहाँ छैन।
उनले भनिन्,’श्रीमान्ले ज्यामी काम गरेर कपन हाइक चोकमा रहेको सुमो सहकारीमा पैसा जम्मा गरेका थियौँ। २ लाख ३० हजार रुपैयाँ जम्मा भएको थियो। त्यो सहकारी अहिले त्यहाँ छैन।’
उनका श्रीमान् अहिले पनि ज्यामी काम गर्छन्। आफूहरूले दुःख गरेर कमाएको रकम सहकारीले खाइदिएपछि आफू र्यालीमा आएको उनले बताइन्।
भावुक हुँदै उनले भनिन्,’ज्यामी गरेको पैसा २५/५० रुपैयाँ गरेर जम्मा गरेर त्यति बनाएको थियो। त्यो नि खाइदियो। केही हुन्छ कि भनेर र्यालीमा आएकी हुँ।’
उनका १४ वर्षका एक छोरा पनि छन्। अहिले पढ्दै छन्। घर खर्च चलाउन पनि समस्या भएपछि अहिले आफू अरुको घरमा काम गर्ने गरेको उनले सुनाइन्।
सहकारी, लघुवित्त, बैंक तथा मिटरब्याज पीडितहरूले पछिल्लो समय काठमाडौँ केन्द्रित आन्दोलन गरिरहेका छन्। त्यही क्रममा रत्नपार्कमा भेला भएका उनीहरू र्यालीसहित बालुवाटार पिपलबोटसम्म पुगेर प्रदर्शन गरेका थिए।
तामाङ पनि आफ्नो रकम फिर्ता हुने आशमा ६ वर्षकी छोरी बोकेर प्रदर्शनमा सहभागी भएकी हुन्।
भर्खरै
लोकप्रिय
