हुम्ला- सरकारले सेवाग्राहीलाई उपलब्ध गराउँदै आएको सामजिक सुरक्षा भत्ता लिन जेष्ठ नागरिकलाई आठ घण्टादेखि दुई दिनसम्म हिड्नु पर्ने बाध्यता रहेको छ । उक्त सेवा बैङ्कमार्फत सम्वन्धित जेष्ठ नागरिकको खातामा जम्मा हुन थालेपछि भत्ता निकाल्न जेष्ठ नागरिकलाई सास्ती हुने गरेको हो ।
ताँजाकोट गाउँपालिका– ३ को मासपुरका ७४ वर्षको जेष्ठ नागरिक गोरे बुढाले सरकारले प्रदान गर्दै आएको जेष्ठ नागरिक भत्ता बुझ्नका लागि आठ घण्टा पैदल हिडेर जानु पर्ने बाध्यता रहेको बताए । हालसम्म सडक सञ्जाल नजोडिएको मासपुर गाउँबाट गाउँपालिका केन्द्र वा अन्यत्र जानका लागि पैदल हिड्नुको बिकल्प नै छैन । उनले कम्तीमा वर्षको दुई पटक गाउँपालिका केन्द्र छप्रेलामा गएर आफ्नो सामाजिक सुरक्षाभत्ता लिने गरिएको बताए ।
बिरामी भएको बेला भने लिन जान नसकिने बताउँदै उनले जेष्ठ नागरिकलाई भने यो भत्ता लिन सास्ती हुने गरेको बताए । आफ्नो गाउँका बाईस घरधुरीमा दश जना जेष्ठ नागरिकहरूले सामाजिक सुरक्षा भत्ता पाउने गरेको र सवैलाई भत्ता लिन समस्या भए पनि जानैपर्ने बाध्यता रहेको बताउँदै उनले यसलाई सहज बनाउन माग गरे ।
उक्त गाउँबाट जेष्ठ नागरिकलाई सामाजिक सुरक्षा भत्ता लिन तीन दिन लाग्ने गर्छ । एक दिन आउन, एक दिन जान र एक दिन पैसा बैंङ्कबाट निकाल्न समय लाग्ने गर्छ । चेकमा समेत औठाछाप लगाउनु पर्ने भएको कारण हिड्न नसक्ने जेष्ठ नागरिकले परिवारका सदस्यहरूले घोडामा चढाएर भत्ता झिक्न लग्ने गर्दै आएका छन् ।
यता चङ्खेली गाउँपालिका– ५ को दुर्गमको बस्ती नेप्काका जेष्ठ नागरिकको पीडा पनि उस्तै रहेको छ । उक्त गाउँका ७० वर्षका जेष्ठ नागरिक गोर्या तामाङले जेष्ठ नागरिक भत्ता लिन एक दिन पैदल हिडेर जानु पर्ने गुनासो सुनाए । सरकारको नियम भत्ताको रकम हिनामिन नहोस् भन्ने राम्रो भएको भए पनि आफू जस्ता जेष्ठ नागरिकलाई भने समस्या भएको उनले बताए । नेप्काबाट गाउँपालिका केन्द्र पिप्लाङ पुग्न बिहानै हिडेपछि बेलुका मात्र पुगिन्छ ।
उनले लड्ठी टेकेर हिड्दै समाजिक सुरक्षा भत्ता लिनु पर्ने बाध्यता रहेको बताए । नेप्का गाउँमा सत्तरी जना जेष्ठ नागरिक रहेको र उनीहरूमध्ये अधिकाँश वर्षको एक पटक मात्र गाउँपालिका केन्द्रमा पुगेर भत्ता झिक्ने गर्दै आएका छन् । सो गाउँबाट पनि सामाजिक सुरक्षा भत्ता लिन तीन दिन लाग्ने गर्छ ।
त्यस्तै नाम्खा गाउँपालिका– ६ को हिमालपारीको गाउँ लिमीका जेष्ठ नागरिकहरुको सामाजिक सुरक्षा भत्ता बुझ्ने पीडा रहेको वडा अध्यक्ष पाल्जोर तामाङले बताए ।
लिमीका तीन वटै गाउँमा सामाजिक सुरक्षा भत्ता लिने २२१ जना रहेको र त्यसमा जेष्ठ नागरिक ७३ जना, अन्य जेष्ठ नागरिक ८९, एकल महिना १५ जना, अपाङ्ग एक जना र बाल पोषण भत्ता लिने ४३ जना रहेको बताउँदै उनले सबैलाई यो सुविधा लिनका लागि गाउँपालिका केन्द्र याल्वाङ पुग्न दुई दिन लाग्ने बताए ।
वडा अध्यक्ष तामाङले हिड्न नसक्ने सेवाग्राहीका लागि बैंङ्कलाई बिकल्पको व्यवस्था गर्न अनुरोध गर्दा कुनै सुनुवाई हुन नसकेको बताए । लिमीका एक जना ७८ वर्षका जेष्ठ नागरिक तन्जन तामाङ हिड्न नसक्ने भएपछि डेढ वर्षदेखि बैङ्कबाट भत्ता निकाल्न नसकिएको हो । लिमी बाहेक नाम्खा गाउँपालिकाको यारी, चाला र मुचु गाउँका जेष्ठ नागरिकहरुलाई पनि सामाजिक सुरक्षा लिन सास्ती भोग्नु परिरहेको छ ।
भर्खरै
लोकप्रिय
