राजसंस्था पुनर्स्थापना संयुक्त जनआन्दोलन समितिका कार्यवाहक संयोजक जगमान गुरुङले वैशाख २२ गते सामूहिक गिरफ्तारी दिने घोषणा गरेका छन्। उनले सरकारसँग राजसंस्था पुनर्स्थापना संयुक्त जनआन्दोलन समितिका संयोजक नवराज सुवेदीमाथिको नजरबन्द हटाउन, पक्राउ परेका नेताहरू रिहा गर्न वैशाख २१ गतेसम्मो म्याद दिँदै माग पूरा नभए आफूहरूले वैशाख २२ गतेको दिन सामूहिक गिरफ्तारी दिने बताएका हुन्।
राजसंस्था पुनर्स्थापना संयुक्त जनआन्दोलन समितिले बुधबार गरेको पत्रकार सम्मेलनमा उनले भने- ‘हाम्रो अभियान सफल हुन्छ। हरेस नखानुस्। आजको आज, भोलिको भोलि भन्ने हुँदैन। सबै कुराको समय आउँछ। वैशाख २१ गतेसम्म पनि अहिलेको सरकारले हाम्रा साथीहरूको वारेन्ट बर्खास्त गरेन भने, हाम्रो संयोजकज्यूको नजरबन्द खुलाएन भने, बन्दी बनाइएका साथीहरूलाई मुक्त गराएन भने २२ गतेको दिनमा हामीले तीनकुनेमा सहादत प्राप्त गर्नुभएका वीर सहीदहरूको रगतले लतपतिएको माटोको टीका लगाएर सामूहिक गिरफ्तारी दिने हो।’
उनले २१ गतेसम्म माग पूरा नभए सबैभन्दा पहिले आफूले गिरफ्तारी दिने बताए। ‘सबैभन्दा पहिले मैले नै गिरफ्तारी दिन्छु, म ७८ वर्ष पुगेँ। हामीले ज्यान माया मारेर आन्दोलनमा जाने हो। त्यसपछि को को आउनुहुन्छ, आउनुस्,’ उनले भने।
तस्बिरहरू:
भर्खरै
लोकप्रिय
