हुम्ला – हुम्लामा तीन दिनदेखि सुत्केरी बेथा लागेकी गर्भवती महिलाको उद्धार गरिएको छ। मंगलबार सिमकोट गाउँपालिका– २ की १६ वर्षीया पुष्पा बोहरा भण्डारीको नेपाली सेनाको हेलिकप्टरबाट उद्धार गरिएको हो।
स्वास्थ्य सेवा कार्यालयकी वरिष्ठ अनमी सरिता बोहराका अनुसार उनलाई उद्धार गरेर प्रदेश अस्पताल सुर्खेत लगिएको छ। २८ हप्ताकी गर्भवती उनलाई समय नपुग्दै बेथा लागेको र अवस्था जटिल भएका कारण सुविधा सम्पन्न अस्पतालमा रेफर गरिएको बोहोराले बताइन्।
आइतबार समस्या देखिएपछि उनलाई ठेहे स्वास्थ्य चौकी ल्याएर उपचारको प्रयास गरिएको थियो। स्वास्थ्य चौकीले सोमबार बिहान रेफर गरेपछि जिल्ला अस्पतालमा ल्याइएको थियो।
सोमबार नै जिल्लाबाहिर रेफर गरिएको भए पनि कालिकोटको खराब मौसमका कारण हेलिकोप्टर आउन सकेको थिएन
गाउँपालिका र स्वास्थ्य सेवा कार्यालयको सिफारिसमा जिल्ला प्रशासन कार्यालयको समन्वयमा राष्ट्रपति महिला उत्थान कर्यक्रमको आर्थिक सहयोगमा हेलिकप्टरबाट उद्धार गरिएको प्रमुख जिल्ला अधिकारी नारायण पाण्डेयले बताए।
भर्खरै
लोकप्रिय
