धनगढी – धनगढी उपमहानगरपालिका–५ मा बेवारिसे जनावरका लागि ‘एनिमल सेल्टर’ स्थापना गरिएको छ। वडाध्यक्ष गजेन्द्र शाहीको पहलमा बिहीबार एक औपचारिक कार्यक्रमकाे आयाेजना गरी सेल्टर सञ्चालनमा ल्याइएकाे हो।
वडाध्यक्ष शाहीका अनुसार सडकमा छाडा अवस्थामा रहेका कुकुर र अन्य पशुपंक्षीको उद्धार तथा संरक्षण गर्न सेल्टर स्थापना गरिएको हो। उनले जनावरहरूको लागि खाना, पानी र छानाको व्यवस्था गरिएको जानकारी दिए।
वडाध्यक्ष शाहीले आफ्नै विवाह खर्च कटौती गरी समाजसेवी कार्य थालेका हुन्। केही दिनअघि मात्र विवाह बन्धनमा बाँधिएका वडाध्यक्ष शाहीले विवाह भाेजमा दही–जेरी मात्र खुवाएका थिए।
उनले जनावरप्रति दया, सहानुभूति र उत्तरदायित्व बोधबाट प्रेरित भई एनिमल सेल्टर स्थापना गरेको बताए।
उनले भने, ‘विवाहमा सबैलाई निम्ता गरेपनि दहि जेरी खुवाएँ, त्यस पार्टीबाट बचाएकाे पैसाले सेल्टर खाेले। सेल्टरमा कुकुरसहित अन्य सडक पशुचौपाया तथा पशुपंक्षीका लागि समेत खाना र आश्रयको व्यवस्था मिलाइएको छ।
भर्खरै
लोकप्रिय
