धनगढी – कैलाली कारागारमा कैदीको मृत्यु भएको घटनामा जिल्ला प्रहरी कार्यालय कैलालीमा कार्यरत प्रहरी नायब निरीक्षक(सई) पक्राउ परेका छन्।
डडेल्धुराको भागेश्वर गाउँपालिका–५ का २८ वर्षीय हरिस सिंह पालीको मृत्यु प्रकरणमा जिल्ला प्रहरी कार्यालयमा कार्यरत सई हरजीत नाथलाई पक्राउ गरिएको प्रहरीले जनाएको छ।
जिल्ला प्रहरी कार्यालय कैलालीका प्रवक्ता प्रहरी डीएसपी राजकुमार सिंहले पीडित पक्षले दिएको किटानी जाहेरीका आधारमा नाथलाई पक्राउ गरी अनुसन्धानका लागि हिरासतमा राखिएको पुष्टि गरे।
नाथ मृतक पाली प्रतिवादी रहेको बैंकिङ कसुर मुद्दाका वादीसमेत हुन्। नाथले दिएको मुद्दामा पालीलाई जिल्ला अदालतले २०८० साल फागुनमा १० दिन कैद र दुई लाख जरिवाना हुने फैसला गरेको थियो।
मृतककी श्रीमती जानकी साउँदले नाथकै योजनामा कारागारभित्र कुटपिट गरी श्रीमान्को हत्या गरिएको आरोप लगाउँदै बुधबार कारागार प्रमुख बसन्त बहादुर खत्रीसहितका पाँच जनाविरुद्ध किटानी जाहेरी दिएकी थिइन्। तर, कैलाली प्रहरीले उनलाई जाहेरी सच्याएर ल्याउन भनेपछि बिहीबार भने नाथविरुद्ध मात्र जाहेरी दिइएको छ।
प्रहरीले किटानी जाहेरी दर्ता गरेर सई नाथलाई नियन्त्रणमा लिएपछि पीडित पक्ष शव बुझ्न तयार भएको छ। सेती प्रादेशिक अस्पतालको शवगृहमा राखिएको शवको परीक्षण सकेर परिवारलाई बुझाइने प्रहरीले जनाएको छ।
यही असार १ गते कारागारमा राखिएका पाली असार २ गते राति साढे १० बजे कारागारकाे बाथरुमनजिकै अचेत अवस्थामा भेटिएपछि उपचारका क्रममा सेती प्रादेशिक अस्पताल मृत्यु भएको थियो। मृतक पालीका शरीरमा चोटपटकसमेत देखिएका कारण परिवारले उनको योजनाबद्ध हत्या गरेको आरोप लगाएको छ।
भर्खरै
लोकप्रिय
