जनकपुरधाम – मधेस सरकारको आगामी आर्थिक वर्ष २०८२/८३ को बजेट सर्वसम्मतले पारित भएको छ। सोमबार बसेको प्रदेशसभा बैठकलाई सदनमा रहेको सम्पूर्ण प्रतिपक्षी दलले बैठक बहिष्कार गरेपछि सञ्चालन भएको बैठकमा विनियोजन विधेयक २०८२ सर्वसम्मतले पारित भएको हो।
अर्थमन्त्री सुनिलकुमार यादवले सदनमा विनियोजन विधेयक, २०८२ पारित गरियोस् भन्ने प्रस्ताव प्रस्तुत गरेकोमा हुन्न भन्ने आवाल नसुनिएपछि सभामुख रामचन्द्र मण्डलले विनियोजन विधेयक सर्वसम्मतले पारित भएको घोषणा गरे।
मधेस प्रदेशसभामा १० दल रहेकोमा जनमत पार्टीको नेतृत्वमा रहेको सरकारमा नेकपा एमाले, नेपाली कांग्रेस र लोकतान्त्रिक समाजवादी पार्टी सरकारमा छ।
बाँकी रहेको ६ दल जनता समाजवादी पार्टी, नेपाल, माओवादी केन्द्र, नेकपा एकीकृत समाजवादी पार्टी, राप्रपा, नागरिक उन्मुक्ति पार्टी र संघीय समाजवादी पार्टी नेपाल प्रतिपक्षमा छ।
अर्थमन्त्री सुनिलकुमार यादवले असार १ गते ४६ अर्ब ९८ करोढ ३३ लाख ५१ हजार बराबरको बजेट प्रस्तुत गरेका थिए। त्यसयता बैठक पटक पटक अवरुद्ध हुँदै आएकोमा सोमबार प्रतिपक्षी दलको बहिष्कारकोबीच भएको छलफल पश्चात मन्त्रालयगत रुपमा मन्त्रीहरुले जवाफ दिएपछि विनियोजन विधेयक पारित भएको हो।
सभामुख मण्डलले विनियोजन विधेयक पारित भएपछि बैठक ५ बजेर ५ मिनेटसम्मका लागि स्थगित गरेका हुन्।
भर्खरै
लोकप्रिय
