हुम्ला- कर्णाली करिडोरको सलीसल्लादेखि सिमकोटसम्मको ५० किलोमिटर दुरीमा पर्ने ६ वटा खोलामा पक्की पुल निर्माण हुने भएको छ।
खोलाहरूको फराकिलो विस्तार र वर्षायाममा पानीको बहाव अत्यधिक हुने भएकाले कल्भर्ट असक्षम ठहर गर्दै पक्की पुल निर्माण गर्न लागिएको हो।
हिल्सा-सिमकोट सडक योजनाका प्रमुख बेलबहादुर नेपालीका अनुसार पुल निर्माण सर्केगार्ड गाउँपालिका र चङ्खेली गाउँपालिकाको सिमाना सलीसल्लादेखि सिमकोट गाउँपालिका-४ को स्याम्नेसम्म गरिनेछ।
पुल बन्ने खोलाहरूमा स्याम्ने खोला (सिमकोट-४), याङ्चु खोला (खार्पुनाथ-५), चिसामुल खोला (खार्पुनाथ-१), ठेही खोला (सर्केगार्ड-६), गोठी खोला (सर्केगार्ड-४), र गिउसी खोला (सर्केगार्ड-६) रहेका छन्।
पुलहरूको लम्बाइ ५० देखि १०० मिटरको हुने अनुमान गरिएको छ। लागत ईष्टिमेट तयार भई स्वीकृतिका लागि विभागमा पठाइने र त्यसपछि निर्माण प्रक्रिया अगाडि बढ्ने जनाइएको छ।
हालसम्म हेक्पा, ताग्रु र सल्ली खोलामा पक्की पुल निर्माण सम्पन्न भइसकेको छ भने याङ्गार र खार्पुमा निर्माणाधीन छन्। सलीसल्ला र थाहा खोलामा ठेक्का लागेको भए पनि काम सुरु हुन सकेको छैन।
यस्तै, कवाडी, गल्बागार्ड, खार्पु, तुम्कोट, हिल्सा र सलीसल्लामा बेलिब्रिज निर्माण गरिएका छन्।
भर्खरै
लोकप्रिय
