दाङ– लमही नगरपालिका–३ फल्कापुरमा नेपाल महिला हस्तकला कपडा उद्योग सञ्चालनमा आएको छ । उद्योग सञ्चालनमा आएपछि स्थानीय ३० जना महिला तथा पुरुषले प्रत्यक्ष रोजगारी पाएका छन् ।
कपडा उद्योगमा घरेलु कच्चा पदार्थको अधिकतम प्रयोगसँगै महिलाहरूलाई तान तान्ने र कपडा बुन्ने सीप सिकाएर उनीहरूलाई स्वरोजगार बनाउने प्रयास गरिएको छ ।
उद्योगको औपचारिक उद्घाटन बुधबार लुम्बिनी प्रदेशका मुख्यमन्त्री चेतनारायण आचार्यले गरेका छन् । मुख्यमन्त्री आचार्यले उद्घाटन समारोहमा बोल्दै स्थानीय स्रोत र सीपमा आधारित उद्योगहरूको प्रवर्द्धनबाटै रोजगारी सृजना गर्न सकिने बताए ।
‘हामीले दैनिक प्रयोग गर्ने अधिकांश कपडाहरू विदेशबाट आयात गरिएका हुन्छन् । अब लुम्बिनीमै उत्पादन भएका सामग्रीलाई प्राथमिकता दिनु आवश्यक छ,’ उनले भने ।
उद्यमशीलता प्रवद्र्धन गर्न तालिम, प्रविधि र बजारको पहुँच उपलब्ध गराउन प्रदेश सरकार प्रतिबद्ध रहेको उनले उल्लेख गरे । उद्योगमा हाल बिहान १० बजेदेखि बेलुका ५ बजेसम्म महिलाले नियमित रूपमा काम गर्दै आएका छन् ।
उनीहरूलाई मासिक १० हजार रुपैयाँभन्दा बढी आम्दानी हुने गरेको उद्योग सञ्चालक कृष्ण खनालले जानकारी दिए । उद्योगमा प्रयोग भएका अधिकांश उपकरण र सामग्री स्थानीयस्तरमै निर्माण गरिएको छ ।
‘बाहिरबाट धागो मात्रै खरिद गरिएको हो । बाँकी सबै स्थानीय स्रोत र श्रमबाट उत्पादन गरिएको हो,’ खनालले भने । उद्योगमा कार्यरत महिलाहरू धोती, सारी, ब्लाउज, सलजस्ता कपडाहरू उत्पादन गरिरहेका छन् । उनीहरूले तान तान्ने, कपडा बुन्ने लगायतका सीप सिक्दै आत्मनिर्भर बन्ने यात्रामा छन् ।
तस्बिरहरूः
भर्खरै
लोकप्रिय
