जनकपुरधाम – प्रधानमन्त्री केपी शर्मा ओलीले आफूलाई नयाँ शक्ति भन्नेहरु देशमा अराजकता फैलाउन कुदिरहेको आरोप लगाएका छन्।
शुक्रबार जनकपुरधामस्थित मधेस प्रदेश प्रहरी कार्यालयको भवन उद्घाटन कार्यक्रममा बोल्दै प्रधानमन्त्री ओलीले विगतका अँध्यारा दिन फर्काउन उनीहरू लागेको आरोप लगाएका हुन्।
‘आम जनतालाई नयाँ शक्ति हौँ भनेर भ्रममा पारिरहेका छन्’, उनले भने, ‘भर्खर खुलेका पार्टी, भवितव्यले खुलेका पार्टी नयाँ त हुँदै होइनन्, जसको कुनै योगदान छैन।’
प्रधानमन्त्री ओलीले जसको कुनै योगदान हुँदैन उसले देशलाई माया नगर्ने बताए। ‘जसको आफ्नो हो उसले माया गर्छ’, उनले भने, ‘हामीले बलिदान गरेका छौँ, लडाइँ गरेका छौँ। संघर्ष गरेको आजको स्थितिमा पुग्नका लागि। सहिद बनेका छन्। धेरैले सहादत प्राप्त गरेका छन्। सहिदहरुप्रति सम्मान अर्पण गर्न चाहन्छु।’
उनले अहिलेको व्यवस्था ल्याउन धेरैले जेलनेल भोगेको र बलिदान दिएको बताए। उनले भने, ‘जसले यो दिन भत्काउन चाहन्छ, देशलाई बर्बादीतर्फ लाग्न चाहन्छ। संसद्मा आउँछन्, भत्ता पडकाउँछन् र बाहिर जान्छ। जनताको समस्याको कुरासँग कुनै सरोकार छैन। तिनीहरुलाई यो व्यवस्था अति नै अप्रिय लागेको छ।’
उनले थपे, ‘योगदान, बलिदान दिएका देशका पुराना र ठूला दलको सरकार हो, यसले देशलाई स्थिर सरकार दिएको छ। सरकार परिवर्तन हुन्छ भन्ने कहाँ गए? उनको स्वार्थको सारंगी पनि बन्द भयो।’
भर्खरै
लोकप्रिय
