मोरङ – बालकल्याण विद्यामन्दिरले राटनगरमा सम्पन्न १४ वर्षमुनिको नाइन ए साइड विकेभिएम कप फुटबल प्रतियोगिताको उपाधिमा कब्जा गरेको छ।
जिल्ला फुटबल संघ मोरङको प्राविधिक सहयोगमा आयोजित प्रतियोगितामा मोर्डन एरालाई एकका विरुद्ध दुई गोलले पराजित गर्दै घरेलु टोली विकेभिएमले उपाधिमा कब्जा गरेको हो।
रोमान्चक बनेको खेलको ७ औं मिनेटमा विनित माझीले गोल गर्दै मोर्डन एरालाई सुरुवाती अग्रता दिलाएका थिए। यद्यपि, खेलको १८ औं मिनेटमा विकेभिएमका रोजन पाण्डेले बराबरी गोल फर्काए। पहिलो हाफ समान एक गोलको बराबरीमा रोकिएको खेलमा दोस्रो हाफ थप प्रतिस्पर्धात्मक बनेको थियो।
सोही क्रममा खेलको ४८ औं मिनेटमा घरेलु विद्यालय विकेभिएमका लागि निश्चल चौधरीले गोल गरे। चौधरीको सोही गोलले विकेभिएमलाई विजयी बनाएको थियो। उपाधि हात पारेको विद्यालयलाई विराटनगर महानगर वडा नम्बर ११ का अध्यक्ष तीर्थेन्द्र न्यौपानेले वितरण गरेका थिए। प्रतियोगितामा हाई स्कोररमा विकेभिएमका रोजन पाण्डे, उत्कृष्ठ गोलरक्षक विकेभिएमका सुविज्ञ दाहाल भए।
त्यसैगरी, सर्वोत्कृष्ट खेलाडीमा मोर्डन एराका रोशिक राई भएका थिए। प्रतियोगितामा फेयर प्ले ग्रीनल्याण्ड सेकेण्डरी स्कुल हुन पुगेको थियो।
भर्खरै
लोकप्रिय
