दाङ- लुम्बिनी प्रदेशमा १८औँ पुस्तकालय दिवस- २०८२ मनाइएको छ । ‘हाम्रो पुस्तकालय हाम्रो भविष्य’ भन्ने मूल नाराका साथ कपिलवस्तुमा दिवस मनाइएको हाे ।
कार्यक्रमलाई सम्बाेधन गर्दै सामाजिक विकास मन्त्री जन्मजय तिमिल्सिनाले पुस्तकालयलाई केवल पुस्तक राख्ने स्थान नभई ज्ञान, चेतना र संस्कृतिको केन्द्रका रूपमा व्याख्या गरेका छन् ।
उनले पुस्तकालयलाई समाजलाई शिक्षित, सशक्त र जागरूक बनाउन मद्दत गर्ने अमूल्य सम्पत्ति भन्दै यसको महत्त्व सूचना र प्रविधिको युगमा अझ बढेको उल्लेख गरेका हुन् ।
प्रदेश भित्र शिक्षा, विज्ञान तथा प्रविधि मन्त्रालयको २०२२ सालको सर्वेक्षण अनुसार ११० सामुदायिक पुस्तकालय रहेको तथ्यांक प्रस्तुत गर्दै उनले यी पुस्तकालयहरूको पहिचान, स्तरोन्नति र सुदृढीकरण प्रदेश सरकारको प्राथमिकतामा रहेको स्पष्ट पारे ।
यसै सन्दर्भमा उनले सामुदायिक पुस्तकालयलाई शैक्षिक स्रोत केन्द्रका रूपमा विकास गर्ने, विद्यालय पुस्तकालयलाई आधुनिक शिक्षण सामग्रीसहित समृद्ध बनाउने, डिजिटल पुस्तकालय प्रणालीलाई विस्तार गर्ने तथा पुस्तकालय सञ्चालनमा स्थानीय तह, विद्यालय, समुदाय र निजी क्षेत्रबीच सहकार्य गर्ने नीति अवलम्बन गरिएको जानकारी दिएका छन् ।
उनले,’हाम्रो पुस्तकालय हाम्रो भविष्य’ भन्ने नाराले जिम्मेवारी र संकल्प दुवै गराएको उल्लेख गर्दै पुस्तकालयलाई जन-जनको अभियान बनाउन सबैलाई आह्वान गरेका छन् । उनले बालबालिकादेखि वृद्धसम्म सबैलाई पुस्तकालयतर्फ आकर्षित गर्ने, पुस्तकालयको संरक्षण र उपयोगमा सक्रिय सहभागिता जनाउने तथा अध्ययन-संस्कृतिको पुनर्जागरणमार्फत उज्ज्वल भविष्य निर्माण गर्नुपर्नेमा जोड दिए ।
समारोहका क्रममा वि.सं.१९९३ सालमा स्थापित पशुपति प्रताप पुस्तकालयलाई सम्मान गरिएको थियो । मन्त्री तिमिल्सिनाले सो पुस्तकालयले पठन-संस्कृति विकासमा पुर्याएकाे योगदानप्रति मुक्त कण्ठले प्रशंसा गर्दै आगामी दिनमा यसको विकास र उन्नयनमा आवश्यक सहयोग गर्ने प्रतिबद्धता व्यक्त गरे ।
कार्यक्रममा लुम्बिनी प्रदेश सभा सदस्य सुधाकर पाण्डे, मन्त्रालयका सचिव बसन्त प्रसाद कोईराला, मुख्यमन्त्री तथा मन्त्रीपरिषद् कार्यालयका सचिव कबिन्द्र नेपाल, कपिलवस्तु जिल्लाका विभिन्न पालिकाका प्रमुख-उपप्रमुख, जनप्रतिनिधि, प्रहरी प्रमुख, समाजसेवी, शिक्षाप्रेमी, शिक्षक, विद्यार्थी र पत्रकारहरूको उपस्थिती रहेको थियो ।
साे अवसरमा वक्तृत्वकला प्रतियोगिताका विजयी विद्यार्थीलाई पुरस्कार वितरण, प्रतिभावान विद्यार्थीलाई सम्मान तथा विभिन्न व्यक्तित्वलाई सम्मान गरिएको छ ।
भर्खरै
लोकप्रिय
