- मुख्यमन्त्री सिंहले फेसबुकमा राजीनामा घोषणा गरे पनि प्रदेश प्रमुखलाई पत्र बुझाउन अहिलेसम्म इन्कार गरेका छन्।
- आन्दोलनका बीच सिंहले भूमिका खेल्ने ठानिए पनि राजनीतिक परिवर्तनको लागि बाधक बन्ने इच्छा छैन।
- जनधनको क्षति रोक्न तयार रहेको बताए पनि अहिले क्षति भएर राजीनामाको औचित्य समाप्त भएको देखिन्छ।
जनकपुरधाम- मधेस प्रदेशका मुख्यमन्त्री सतिशकुमार सिंहले पदबाट राजीनामा नदिने बताएका छन् । जेन–जीको आन्दोलनको दिन मंगलबार सामाजिक सञ्जाल फेसबुकमा राजीनामा दिएका मुख्यमन्त्री सिंह प्रदेशप्रमुखलाई राजीनामा पत्र नबुझाउने भएका छन् ।
उनले आन्दोलन भइरहँदा डा. सीके राउतको फेसबुक पेजमार्फत मुख्यमन्त्री सिंहलाई राजीनामा दिन निर्देशन दिएपछि सिंहले राजीनामाको घोषणा गरेका थिए ।
‘जनताको विश्वास र मतबाट निर्वाचित भएर जनप्रतिनिधि बन्नु मेरा लागि जीवनकै ठूलो गौरव थियो । तर नागरिककै जीवन सुरक्षित गर्न नसकिएको वर्तमान परिस्थितिले मलाई आत्मसम्मानपूर्वक यो निर्णय लिन बाध्य बनाएको छ ।
नागरिकको ज्यान भन्दा ठूलो अरु केही छैन भन्ने अटल विश्वासका साथ, जनताको अधिकार र भविष्यप्रति उत्तरदायी हुँदै म मधेश प्रदेशको मुख्यमन्त्री पदबाट राजीनामा गर्दछु’, मुख्यमन्त्री सिंहले फेसबुकमा लेखेका थिए ।
मंगलबार नै फेसबुकमा राजीनामा दिएका सिंहले हालसम्म प्रदेश प्रमुखलाई राजीनामा पत्र बुझाएका छैनन् । प्रदेश प्रमुख सुमित्रा सुवेदी भण्डारीका स्वकीय सचिय टिका उप्रेतीले मुख्यमन्त्रीको राजीनामा पत्र हालसम्म नआएको बताए ।
मुख्यमन्त्री सिंहले सामाजिक सञ्जालमार्फत राजीनामा दिने घोषणा गरेपनि अहिले आफू राजनीतिक परिवर्तनको लागि बाधक नबन्ने बताए । उनले आफूलाई हटाएर अरुलाई मुख्यमन्त्री बनाउनको लागि राजनितिक खेल हुन्छ भने त्यसको लागि आफू तयार नरहेको बताए ।
‘जनधनको क्षति रोक्नको लागि मैले पद त्याग गर्न तयार रहेको समाजिक संजालमा लेखेको थिए तर जनधनको क्षति भएको कारणले अब त्यो कुराको औचित्य सकिएको छ’, उनले भने ।
जेन–जीको आन्दोलनको क्रममा मधेस प्रदेश सरकारको प्रशासनीक भवन, मधेस प्रदेशसभा लगायत विभिन्न सरकारी कार्यालय तथा नेताहरुको घरमा आगजनी गरिएको थियो ।
भर्खरै
लोकप्रिय
