काठमाडौँ– जनकपुरधाममा दुई समुदाय (हिन्दु-मुस्लिम)को विवादको कारकको रुपमा रहेको पोखरीलाई अतिक्रमण मुक्त गराउँदै संरक्षणको काम थालिएको छ ।
जनकपुरधाम उपमहानगरपालिका–२०, देवपुरा रुपैठामा रहेको विवादित तेलिया पोखरीलाई उपमहानगरपालिकाले सहमति अनुसार संरक्षणको काम सुरु गरेको हो ।
विभिन्न समयमा हिन्दु र मुस्लिम समुदायबीचमा पटक–पटक पोखरीको निहुँमा झडप हुँदै आएको थियो । सोमबार दुवै समुदायका अगुवा, जनप्रतिनिधिलगायतको उपस्थितिमा भएको सहमति अनुसार उपमहानगरपालिकाले पोखरी संरक्षणको कार्यलाई सुरु गरेको हो ।
मंगलबार बिहान दुवै समुदायका व्यक्तिहरुको रोहवरमा पोखरीमा रहेको संरचनाहरुलाई हटाएर संरक्षणको कार्यको सुरु गरिएको जनकपुरधाम उपमहानगरपालिकाका प्रमुख मनोज साहले जानकारी दिए ।
पोखरीको चारैतिर बाटो छुटाएर घाट निर्माण गरी वृक्षारोपण गरिने छ । पोखरीलाई दुवै समुदायले आ–आफ्नो पर्व त्यौहारमा प्रयोग गर्ने र त्यसपछि समानहरु हटाउने सहमति भएको हो ।
माता दुर्गाको मूर्ति विसर्जनको क्रममा दुई समुदायबीच झडप भएपछि उक्त क्षेत्रमा स्थानीय प्रशासनले निषेधाज्ञा जारी गरेको छ । सोमबार बसेको सर्वदलीय बैठकमा विगतमा भएको निर्णयहरुलाई नै कार्यान्वयन गर्ने सहमति भएको थियो ।
भर्खरै
लोकप्रिय
