काठमाडौँ- गोविन्द केसीको आन्दोलनले चार वर्षअघि बर्खास्तीमा परेका त्रिवि चिकित्सा शास्त्र अध्ययन संस्थान (आइओएम) का डीन डा. शशि शर्मालाई सर्वोच्च अदालतले पुनर्वहाली गर्न आदेश दिएको छ।
प्रधान्यायाधीश गोपाल पराजुली र न्यायाधीश दीपककुमार कार्कीको संयुक्त इजलासले शर्मालाई पुनर्बहाली गराउन सरकार र त्रिभुवन विश्वबिद्यालयलाई आदेश दिएको हो।
शर्मा २०७० पुस २५ गते आइओएमको डीनमा नियुक्त भएका थिए।
पुस २७ देखि डाक्टर गोविन्द केसीले अनसन सुरु गरे पछि तत्कालीन सरकार प्रमुख एवम् त्रिविका कुलपति खिलराज रेग्मीले उनलाई डिनबाट हटाउन आदेश दिएपछि त्रिवि कार्यकारी परिषद्ले ०७० माघ ८ मा शर्मालाई बर्खास्त गरेको थियो।
शर्मा उक्त निर्णयलाई चुनौती दिँदै फागुन १ गते सर्वोच्च पुगेका थिए।
शर्माको रिटमा पहिलो सुनुवाइ गर्दै तत्कालीन न्यायाधीश सुशीला कार्कीको इजलासले फागुन ११ गते अन्तरिम आदेश जारी गरेको थिएन।
उक्त रिटमा आइतबार अन्तिम सुनुवाइ गर्दै प्रधानन्यायाधीश पराजुलीको नेतृत्वको इजलासले शर्मालाई हटाउने निर्णय गैरकानुनी भएको ठहर गरेको हो।
शर्माको बर्खास्तीपछि वरिष्ठताको आधारमा डा राकेश श्रीवास्तव डीन नियुक्त भएका थिए। श्रीवास्तवले राजीनामा दिएपछि हाल जगदीशप्रसाद अग्रवाल डीन छन्। त्रिभुवन विश्वविद्यालयका उपकुलपति डा. तीर्थ खनियाँले यसबारे अदालतको पत्र प्राप्त भएपछि उचित निर्णय लिइने देशसञ्चारसँग बताए।
यो पनि हेर्नुहोस्:
भर्खरै
लोकप्रिय
