जनकपुर – प्रदेश २ का मुख्यमन्त्री लालबाबु राउतले जनकपुर अञ्चल अस्पतालको छड्के निरीक्षण गरेका छन् । उनले अस्पतालको छड्के निरीक्षण गर्दै सम्पूर्ण विवरण २४ घण्टाभित्र प्रदेश सरकारलाई उपलब्ध गराउन निर्देशन समेत दिएका छन् ।
अञ्चल अस्पतालको लापरबाहीबारे जनगुनासा बढेपछि मुख्यमन्त्री राउत सहितको टोलीले छड्के निरीक्षण गर्दै अस्पतालको दरवन्दी, हाल कार्यरत चिकित्सक तथा कर्मचारीहरुको संख्यासहितको विवरण २४ घण्टाभित्र उपलब्ध गराउन निर्देशन दिएका हुन् ।
उनले अस्पताल विकास समिति विघटन भएर अञ्चल अस्पताल प्रदेश सरकार मातहत आइसकेको अवस्थामा कर्मचारी र अस्पताल व्यवस्थापनको सम्पूर्ण जिम्मेवारी प्रदेश सरकारको रहेको बताउँदै अब मेसुसँगै सम्पूर्ण कर्मचारी प्रदेश सरकारले नियुक्त गर्ने बताए ।
विकास समितिमा लामो समयदेखि काम गर्दै आएका कर्मचारीलाई व्यवस्थापन गर्ने दायित्व अब प्रदेश सरकारको रहेको उल्लेख गर्दै उनले विकास समितिको नाउमा अस्पताललाई भर्ना केन्द्र बनाउन नहुने बताए ।
जनकपुर अञ्चल अस्पताललाई प्रदेशको केन्द्रीय अस्पतालमा मात्र नभई शिक्षण अस्पतालकै रुपमा विकास गर्ने प्रदेश सरकारको लक्ष्य रहेको उनको भनाई छ ।
उनले जनकपुर अञ्चल अस्पतालमा लापरबाही भए अब अस्पतालको मात्र बेइज्जती नभई प्रदेश सरकारको समेत बेइजती हुने भएकाले अब यसको सुधारका लागि आफूहरुले भूमिका निर्वाह गर्ने प्रतिबद्धता जनाए ।
निरीक्षण टोलीमा रहेका सामाजिक विकास मन्त्री नवल किशोर साहले अस्पतालको विकास तथा सहयोगका लागि आफूहरुसँग अस्पतालले कहिल्यै समन्वय नगरेको गुनासो गरेका छन् ।
भर्खरै
लोकप्रिय
